Lospalos: Komisaun Organizadora ba dias nasionais iha Munisipiu Lautém hahú diskute ona ba atividade ne’ebé atu realiza iha loron restaurasaun independensia ba dala XXII.
Prezidente Koomisaun organizadora, Tiborsio dos Santos, informa, selebrasaun loron restaurasaun independensia ba dala 22 sei realiza iha kapitál munisípiu Lautém.
Postu administrativu 6 ne’ebé pertense ba Munisípiu Lautém, sei selebra hamutuk iha kapitál munisípiu hodi garante partisipasaun ho másimu.
“Postu 6 no suku 34 sei partisipa festa ne’e. Aktividade prinsipál iha feira ne’e, hahú husi dia 10 too 20 de Maio. Atividade seluk mak hanesan halai kuda, motor cross, no jogu tradisionál halai karón, joga berlindos, joga PUBG, Certame entre eskola sira, hakerek historia, futu Manu no seluk tan”, dehan prezidente komisaun.
Prezidente Autoridade Munisípiu Lautém, Melio de Jesus, hateten, iha enkontru preparasaun ne’e fo hatene ba responsavel komisaun, prepara ona proposta orsamentu ba aktividade, iha loron 20 de Maio nian.
“Enkontru ba daruak ne’e, atu fahe hanoin ba komisaun sira para sira prepara proposta orsamentu ba kada seksaun sira no aktividade sira nebe sei enkaixa iha loron 20 de Maio 2024 nian”, nia dehan.
Líder máximu munisipiu Lautém ne’e hatutan, loron restaurasaun indepensensia nee sei halo konjutu iha munisipal, tamba nee kada postu administrativu sira sei konsentra hotu iha Munisipiu hodi festeza hamutuk.
Administrador postu administrativu Loré, Joanico da Costa, hateten, nia parte prontu atu mobiliza komunidade hodi partisipa dias nasional nebe sei realiza iha kapitál munisípiu.
“Totál populasaun ne’ebé atu mai partisipa loron nasionais iha Lautém hamutuk 400”, nia promete.
Entretantu, total orsamentu ne’ebé prevê ba dias nasional hanesan 20 de maio, 30 de agusto, no 28 de novembro 2024, hamutuk rihun rua nolu.
Husi total orsamentu ne’e ne’e, aloka rihun hitu ba loron restaurasaun independenaia.
Reportagen: Veru.
Editor : B.A
