Lospalos: Assosiasaun Kolping halao asaun karitativa hodi selebra tinan 25 nia existensia iha Timor-Leste hamutuk ho pasiente sira iha Sentru Saude Lospalos no Clinika Madres Canossiana Lospalos.
Prezidente konsellu diretoria Assosiasaun Kolping Nasional Timor-Leste(KNTL) Maria Ligia De Fatima hateten iha selebrasaun ba tinan 25, Assosiasaun kolping ho nia membru sira deside halo aksaun karidade hodi selebra hamutuk ho pasiente sira iha Centru Saude Lospalos no Clinika Madres Canossiana Lospalos.
“Tema ba selebrasaun ne’e maka Hamutuk ho Kolping luta ba transformasaun sosial no ekologika tuir doutrina social Creda Catolika nian, tamba ne’e kada tinan iha ambitu loron paskua sira halo asaun karitativa ba komunidade sira ne’ebe presija fo tulun.” Katak nia ba Lautem-Post iha Quinta(21/03) foin lalais ne’e.
Ligia hatutan, ativide aksaun karitativa ba moras sira iha hospital ne’e tama ba Assosiasaun Kolping nia programa rasik, tanba ne’e nia hateten iha tempu forte sira hanesan Quaresma no Adventu Assosiasaun Kolping sempre halo aksaun karitativa ba komunidade sira nebe presija.
“Ba tinan ida ne’e ami nia aksaun karidade implementa ba moras sira iha hospital, hanesan asaun ida hodi selebra mos 25 anos existensia Asosiasaun Kolping nian iha Timor-Leste.” Tenik prezidente KNTL ne’e.
Iha sorin seluk Pasiente Jhony Tiago Perreira sente kontente no agradese ba assosiasaun Kolping tamba bele tulun ona sira hodi fahe netik ona nesesidade baziku maske ituan.
“Hau sente kontente no agradese ba Assosiasaun Kolping Munisipal Lautém, tamba bele ajuda ona ami fo sasan ba ami maske ituan”. Nia garadese.
Entretantu nessesidade baziku sira ne’ebe Assosiasaun Kolping fahe ba pasiente sira mak hanesan Susuben Lata, Country Jus, Roti Tawar, Aple, no Be aqua, iha kada pakote ba pasiente sira hamutuk nain 50 resin iha Sentru Saude Lospalos no Clinika Madres Canossiana iha Lospalos.
Ba komemorasaun tinan 25 existensia Kolping iha Timor-Leste ne’e, assosiasaun Kolping selebra ho atividade tolu mak hanesan: Misa Agradesimentu ne’ebe mak halao iha Parte dader, halo vizita ba pasiente sira iha Sentru saude lospalos no Clinika Madres Canossiana nian ne’ebe mak halao iha parte lorai no iha parte kalan nian, Assosiasaun Kolping ho nia Membru Grupu sira selebra ho seremonia kua Kek no Jantara Komfraternidade hamutuk iha edifisio Kolping Timor-Lete nian ne’ebe mak lokaliza iha Trinta de agusto, Postu Lospalos, munisipiu Lautem..
Reportagen: Veru.
Editor: Joenaca Tupa da conceição.
