Lóre: Marciana Ximenes, tinan 25, iha postu administrativu Lóre munisipiu Late, toba de’it iha nia fatin hanesan kosok oan foin moris la hatene la’o.
Mundu kloot ba Marciana tanba nia labele la’o hodi koñese no hatene fatin iha li’ur. Nia toba de’it iha nia fatin tanba nia ain la iha kbiit atu foti hakat ba li’ur.
Defisiente nia inan, Justina Ximenes, konta, Marciana sofre moras malaria bainhira nia tinan 11, nia inan-aman lori ba konsulta iha ospitál maibé la konsege kura.
“Moris mai di’ak, hamriik mesak ona to’o fulan 11 hetan moras ne’e ami lori ba hospital tratamentu durante fulan 7, maibé la iha mudansa.” Justina esplika, oan nia kondisaun ba jornalista sira iha nia rezidensia Vailana, Lore 1-Lautem 31/05.
iha tempu ne’ebá, doutór sira dehan ba Marciana nia inan-aman atu halo tratamentu kontinua, maibé Marciana nia inan aman deside lori fila nia oan ba Lóre tanba la iha osan atu halo tratamentu kontínua. Marciana nia família simu de’it realidade ne’e ho fuan boot.
“Doutór sira dehan malaria maka sirkula ona iha nia ulun, ami mós osan la iha atu kontinua tratamentu entaun alta fila fali mai uma,” nia haktuir.
Marciana sofre defisiente durante tinan 25 nia laran, maibé seidauk simu pensaun (invalides) husi governu tanba la iha dokumentu komprovativu.
autoridade lokál ba hare ona Marciana nia kondisaun maibe presiza aprenzenta nia dokumentu, hanesan Billete idendetidade no kartaun eleitorál hafoin simu pensaun.
“Oinsá ami ko’us ba trata nia dokumentu. Nia (Marciana) toba los de’it, oinsá atu foti nia foto maka ba halo BI. STAE halo ona nia eleitorál maibé atu hetan direitu defisiénsia presiza BI, entaun ami deside husik la hetan mós di’ak. Ami nu’udar inan no aman esforsu hodi sustenta nia moris,” Inan lamenta no simu de’it realidade.
Marciaina nia aman, Carlos Fernandes, nafatin esforsu hodi ko’a tua no faan nuu hodi sustenta ba nia oan sira.
“Ha’u tenke sustenta Marsiana tanba nia mós iha direitu moris no hetan domin husi aman no inan.” nia esplika.
Marciana oras ne’e lakon direitu ba pensaun maibé nia inan aman mós la iha kbiit atu halo buat ne’ebé liu nia kapasidade.
Entretantu informasaun nee jornalista sira rekolla liu husi atividade media tour ne’ebé organiza husi AJTL serbisu hamutuk ho Oxfam Timor Leste no hetan apoiu husi Oxfam Hongkong.
Reportajen: Veru
Editor : B.A
