LOSPALOS: Hafoin hetan apoiu ba instalasaun sistema hortikultura semi moderna husi Adventist Development and Relief Agensy (ADRA) Grupu hortikultura Puakili hetan rendimentu Dolar rihun 4 resin liu husi atividade produsaun Hortikultura durante tinan ida iha munisipiu Lautém.
Xefe grupu Hortikultura Puakili Sirenio Silva Monteiro agradese ba ADRA Timor Leste ne’ebe apoiu ona Sistema instalasaun semi moderna, tanba liu husi sistema ne’e bele tulun ona membru grupu sira hodi hasae rendimentu uma laran nian hodi hodi sustente nessesidade loron loron inklui fasilita oan sira ba Eskola.
“Sente kontente no apresia tebes ba ADRA tamba bele fasilita ami ho material hanesan Tanel, pipa irigasaun bee nian (Irigasaun Turuk). Ami atinji buat ne’ebe ami hakarak no ami bele sustenta ona ami nia moris liu husi Atividade agro negosiu ne’e.” Dehan nia hafoin selebra Loron to’os nain ne’ebe halao iha suku Souru, Postu Lospalos, Munisipiu Lautém. Tersa,(11/06).
Sefe grupu ne’e afirma liu husi atividade produsaun Hortikultura ne’ebe durante ne’e grupu Puakili kuda no fa’an ona iha merkadu lokal, inklui fasilita ona merenda eskola iha tinan kotuk, liu husi rezultadu ne’e bele fasilita ona rendimentu hodi sustenta oan ba Eskola.
“Ho rezultadu ne’e ami bele fasilita ona labarik sira nia eskola. Iha ne’e ami kuda modo Mostarda, Morakot, Alfase, Brijela, Baria, Ai-manas, Fore talin, no Liis. Ami fa’an ona ba vendedor sira no sai ona parseiru ba sira. Iha tinan kotuk fasilita mos ba merenda eskola ninian, no husi atividade produsaun durante tinan ida ami hetan ona rendimentu hamutuk Dolar rihun 4 resin” Katak Xefe grupu ne’e.
Entretantu Program manager ADRA Timor Leste, iha munisipiu Lautém Isac Da Gama hateten apoiu ne’ebe fo ba grupu targetu sira mak halai liu ba tekniku no kapasitasaun nian ho nune’e bele hasae koñesimentu membru grupu sira konaba oinsa hasae produsaun liu husi atividade hortikultura nian iha Munisipiu Lautém.
“Fasilidades ne’ebe durante ne’e ADRA Timor-Leste suporta ona ba sira halai liu ba tekniku nian inklui kapasita sira oinsa bele eleva sira nia konesimentu ba iha hortikultuta nian, hodi bele hasae produsaun iha Munisipiu Lautém.” Informa Isac ba Lautém Post Tersa,(11/06).
Jestor ADRA Munisipiu Lautém ne’e hatutan, objektivu prinsipal ba progetu Agronegosiu no Bee ba Moris Diak(ABMD) ne’ebe implementa husi ADRA Timor Leste iha Munisipiu Lautém mak oinsa atu hasae komunidade sira nia moris diak no ekonimia uma laran nian.
Tuir nia, aktividade prinsipal ne’ebe durante ne’e ADRA halo, liu liu ba iha parte bee nian mak oinsa bele responde ba saude inklui hasae komunidade sira nia rendimentu liu husi atividade Hortikultura.
“Ita estabelese bee ba iha komunidade, inklui mos bee ba hortikultira nian. tanba iha hortikultura ita laos orienta atu produs deit, maibe orienta sira oinsa atu produs ao mesmu halo ligasaun ba merkadu lokal hodi responde ba nivel rendimentu ekonomia uma laran nian.” nia subliña.
Iha sorin seluk Administrador posto Lospalos Olderico Coimbra husu ba grupu sira atu kontinua hasae produsaun lokal nune’e bele redus ona produtu importasaun sira husi rai liur.
“Husi sira nia rezultadu ne’e ita hakarak sira sai hanesan faktor determinante, tamba agora dadaun produsaun agricula mai husi liur mos barak. Tamba nee husi parte ADRA konsulta ho autoridade hotu para oinsa ita bele dudu sira atu bele hetan rezultadu maximu hodi bele distribui ba ita nia merkadu lokal” katak APA Lospalos.
Alen de ne’e Autoridade Posto ne’e agrdese ba agensia ADRA ne’ebe durante ne’e fo ona apoiu ba grupu agricultura sira liu husi kapasitasaun hodi bele hasae produsaun iha munisipiu Lautém.
“agradese wain ba parseiru Adra ne’ebe mak durante ne’e implemeta programa iha munisipiu Lautém liu-liu iha postu Lospalos. Laos kapasita sira kuda modo deit, maibe komesa fasilita sira hodi habo’ot sira nia tividade atu sira bele compete mos iha merkadu.” Nia gradese.
Entretanto husi intalasaun sistema semi moderna ba atividade Hortikultura ne’e, ADRA Timor Lesta apoiu ona grupu hortikultura Puakili ho ekipamentu irigasaun turuk, Tanel, tanke bee no seluk tan ho total osanmentu hamutuk $ 7000.
Reportagen: Veru.
Editor: Joenaca Tupa da Conceição.
