LOSPALOS: Prezidente Autoridade Munisipál (PAM) Lautém), Melio de Jesus,segunda ne’e, asina kontratu ho kompañia lokál hamutuk 15 atu implementa projetu Programa Dezenvolvimentu Integradu Munisipál (PDIM), nune’e husu implementa ho responsabilidade no kualidade tanba projetu hirak ne’e sei finaliza iha fulan-dezembru tinan 2024.
“Ohin, Autoridade munisípiu Lautém bolu kompañia vensedór hamutuk 15 mai iha administrasaun munisipál atu mai lee kontratu, hafoin asina kontratu ba projetu 15 liuhusi projetu PDIM ba tinan fiskál 2024 nian. Hafoin sira asina kontratu sira tenke serbisu ona. Tanba ohin mensiona iha enkontru dataline ba termina serbisu obra tenke entrega iha dia 31 dezembru 2024,” Prezidente Auotoridade ne’e, hateten ba Lautem Post, hafoin serimónia asina akordu ne’e, iha administrasaun munisipál, Lospalos Vila.
Projetu PDIM ne’e fahe ba kategória rua hanesan ba kategoria A hamutuk projetu lima no kategória B iha projetu 10 ,ho totál orsamentu ne’ebé alokadu hamutuk millaun $1,89.
Projetu hamutuk 15 mak hanesan ba kategória B hamutuk 10 mak hanesan konstrasaun ba parajen karreta iha administrasaun munisÍpiu, konstrusaun be’e iha Nesa-Lobu-Iliomar no seluk tan.
Ba kategoria A nian hamutuk 5 mak hanesan Konstrusaun edefísiu DNTT Lautem, Manutensaun kampu futeból Lospalos, Valeta no Sintina Públiku, Uma baraka merkadu Luru, no eskola 2 iha Leusari no mós re-anúnsia edifisiu Karpintériu iha aldeia Caiwaca.
“Ha’u husu ba Kompañia sira atu hala’o projetu ho resposabilidade hodi garante kualidade projetu tuir tempu kontratu hodi finaliza iha fulan-dezembru 2024, bainhira tékniku sira ba halo verifikasaun mako bra laiha kualidade mak empreza ne’e sei hetan sansaun,” PAM Mélio fó hanoin.
Reportagen: Veru
Editór: Helefatil
