LOSPALOS: Autoridade Munisipál Lautém, liuhusi Sekretáriu Munisipál ba Asuntu Sosiál no Organizasaun Komunitáriu, Zefernino dos Santos Sequira, hamutuk ho funsionáriu sira iha Munisípiu Lautém, hala’o marsa Saudavel, hahú husi Sentru Merkadu Lama-Lospalos, to’o iha Administrasaun Autoridade Munisipál Lautém, atu komemora loron Funsaun Públika ne’ebé monu iha loron 15 Jullu, ba dala-hitu.
Komisaun Funsaun Públika (KFP), deside ho tema Jerál ba tinan ida ne’e “Hametin Unidade no Tane As Étika Profisionalizmu sai Servidór Estadu iha Ambitu Servi Estadu, Povu no Nasaun”.
Hafoin ramata marsa saudavél, Sekretáriu Zefernino Dos Santos Sequira, hateten, loron Funsaun Públika atu fó memória ba funsonáriu sira katak tenke servi Estadu ho profisonalizmu.
“Funsionáriu hotu-hotu tenke haree ba lei Funsaun Públika nian, tenke hatene ninia devér no diretu, molok ezije ita-nia diretu, funsionáriu nia devér mak tenke tama servisu iha pontualidade halo servisu ne’ebé Lei atribui ona funsionáriu ida-idak, hodi bele hala’o ho relasaun di’ak entre internu ho funsionáriu públiku sira mak halo atendimentu ba ita-nia bainaka no komunidade sira”, Sekretáriu ne’e fó hanoin.
Tanba ne’e, husu funsionáriu públika servisu ho pontualidade, loialidade ho pasiensia, hodi ezekuta servisu ba interesse povu no nasaun , tuir Lei funsaun públiku númeru .8/2024, mak hanesan kesi hela funsionáriu públiku sira.
Iha fatin hanesan, Funsionáriu Leticia Belo, sente kontente ba loron importante ne’e no sei halo atendimentu di’ak ba povu Lautem.
“Sente kontente ba loron ida ne’e no ami nu’udar funsionáriu prontu halo atendimentu ba ita nia komunidade”, nia promote.
Entretantu, Funsionáriu Maximino Amaral, mós sente kontente tanba bele hamutuk ho funsionáriu hotu hodi selebra loron importante ne’e liu husi marsa saudavel.
“loron ohin importante ba funsionáriu sira iha kada munisípiu liuliu espesiál ba ami hamutuk ho funsionáriu sira seluk hodi festeza liuhusi marsa saudavél ho kontente. Nune’e ba oin ami sei servisu ho fuan no tuir lei sira”, katak nia.
Reportajen : Veru
Editór : Helefatil
