LOSPALOS– Prezidente Autoridade Munisipál Lautém, Mélio de Jesus ho Sekretáriu Estadu Dezenvolvimento Lokál, Mateus W. dos Santos Talo, hahú hala’o lansamentu fatuk dahuluk ba projetu Planu Dezenvolvimentu Integradu Munisipál (PDIM), hamutuk 15 ba tinan fiskál 2024, iha Munisípiu Lautém.
Iha diskursu Prezidente Autoridade Munisipál Lautém, Mélio de Jesus, hateten emprezáriu sira ne’ebé mak manán Projetu PDIM liuhusi prosesu aprovizionamentu husu atu Implementa projetu tama iha fulan Outobru projetu hotu tenke atinje ona pursentu 80, no tama fim de Dezembru tenke finaliza, hodi halo pagamentu finál.
“Ha’u husu no kontinua hafanu imi emprezáriu sira ne’ebé implementa ona projetu, tenke mantein kaer kontratu liuliu ezekuta projetu ho resposabilidade, garante kualidade no termina konstrusaun tuir tempu”, PAM Lautém fó hanoin.
Nia haktuir tan, konstrusaun Uma Adat Lê JIAVAL Munisípiu Lautém daudaun Tékniku PDIM sira prepara ona dezeñu no BOQ, nune’e iha tempu badak sei loke Konkursu Públiku atu nune’e emprezáriu sira bele kompete, hodi bele halo konstrusaun ba Uma Adat iha Munisipio Lautem.
Nia argumenta, kona-ba Uma Antiga Caivaça, prosesu la’o ona iha avaliasaun sertifikasaun jurídika husi Ministériu Administrasaun Estatál, liuhusi Diresaun Nasionál Planeamento Finansa, hein iha tempu badak sei anunsia manán na’in ba projetu Konstrusaun.
Iha fatin hanesan, Sekretáriu Estadu Dezenvolvimentu Locál, Mateus dos Santos Talo, haktuir tan, konsege tau fatuk dahuluk ba projetu PDIM hamutuk 15, tanba polítika PDIM, ho objetivu atu investe no konstrusaun prioridade sira ne’ebé komunidade sira bele sente no hatene.
Governante ne’e salienta, objetivo Konstrusaun ida ne’e, hodi bele reforsa polítika Governu nian, liuliu foku ba tinan tuir mai, sei halo eleisaun Kamara Munisipál, nune’e husi prioridade sira ne’ebé ita konsege implementa tanba Polítika Planu Integradu Munisipál, Governu aloka Orsamentu mai iha Munisípiu, hodi bele reforsa prioridade sira ne’ebé mak Munisípiu iha nonbele fasilita emprezáriu sira hakbiit aan sira nia finanseiru iha Munisípiu Lautém.
Nune’e husu ba Autoridade Munisipál Lautém, observa no kontrola nafatin projetu sira iha tereñu nune’e meiadu fulan Jullu mak implementa projetu ida ne’e, nune’e mós haree tempu kontratu ne’ebé iha ba kompañia sira, labele fora husi tempu ne’ebé asina kontratu, tanba sirkular husi Ministériu das Finansa mai iha Ministériu Administrasaun Estatál, ne’ebé informa ona ba Prezidente Autoridade Munisipál sira, katak projetu PDIM iha territóriu laran tomak, tenke finaliza iha loron 31 Dezembro 2024.
“Emprezáriu sira ne’ebé mak sai ona parseira Governu iha Dezenvolvimentu Munisipál tenke kolabora no kumpre kontratu ne’ebé asina nune’e bele fasilita Munisipiu hodi Hasae tasa ezejusaun nune’e bele fó oportunidade ba munisípiu hodi hetan orsamente ne’ebé boot iha Tinan oin mai,” Governante ne’e sujere.
Reporajen: Veru
Editór: Helefatil
