Lospalos: Estrada Nasionál husi Postu administrativu Lautém liga ba Lospalos villa to’o Postu administrativu Iliomar Governu sei fó prioridade ba tinan 2024.
Organizasaun Naun governamental (NGO) Luta Hamutuk hato’o kestaun ne’e bainhira realiza enkontru prelimináriu ho autoridade munisípiu Lautém kona-ba konstrusaun estrada nasionál husi diresaun postu Lautem, Lospalos too Postu Iliomar ne’ebé sei halo konstrusaun tinan oin.
Diretor NGO Luta Hamutuk Jose Alves da Costa hatete, objektivu enkontru prelimináriu ho autoridade loka relasiona ho projetu estrada husi diresaun Postu Lautém liga mai Loospalos to’o Iliomar.
“Objektivu enkontru prelimináriu atu fahe informasaun ho autoridade lokál no mós komunidade afetadu sira relasiona ho projetu ne’ebé sei implementa iha tinan oin, atu nune labele iha vitima ba prosesu implementasaun projetu, no mos meiu kompensasaun nian.” dehan nia, 29/09/2023
Diretór Luta Hamutuk José dehan, kompensasaun sei fó kustu tuir tipo no medida bazea ba sasan ne’ebé afeta ba projetu refere.
“Estandar iha hotu ona, hahu husi aifunan to’o uma ne’ebé afeta sei iha kustu para atu selu depende ba nia tipu no medida. tanba ne’e hamutuk ho komunidade atu sira hatene informasaun didi’ak pasiensia hodi hein prosesu, no komunidade ne’ebé afetadu dadaun ne’e iha ona konta bankária hein trenferénsia,” Nia informa.
Nia haktuir, fulan oin sei hetan asinatura entre governu ho Asian Development Banku (ADB) no sei implementa iha tinan oin. Tuir planu primeiru sei hahu husi Postu Lautém, Lospalos to’o Iliomar, sei kontinua liga ba Uatucarbau.
“Tuir planu entre novembru sei iha asinatura entre governu ho ADB no tinan 2024 sei implementa, planu primeiru husi Lautém to’o mai Lospalos, depois etapa segundu husi Lospalos too Iliomar to’o Irabere no etapa terseiru kontinua to’o Uatucarbau Vikeke,” Nia informa.
Iha fatin hanesan, Komunidade afetadu Projetu, husi aldeia Titilari, Moises Morais Montalvao, prontu kopera ho Governu, tanba lori dezenvolvimentu ba povu no rai ida-ne’e.
“Prontu kopera ho estadu, tanba atu hadi’a ita-nia estrada no lori dezenvolvimetu ba ita nia rai no ba ita nia jerasaun, fo indemizisaun laos atu selu maibe indeminizasaun ba sasan nebe afetadu,” Nia fundamenta.
Reprezentante APA Lospalos, Xefe Seksaun Planeamentu Postu administrativu Lospalos, Arsenio Da Conceicao, agradese ba Luta Hamutuk tanba antes ne’e implementasaun projetu refere fo ona konesimentu ba autoridade lokal no populasaun.
“Agradese ba Luta Hamutuk tanba antes projetu tama presija halo sosializasaun, uluk para populasaun ne’ebé afetadu ba konstrusaun estrada bele hetan informasaun di’ak liu-liu ba indeminizasaun ba ema ne’ebé afetadu no bele intende didi’ak planu governu nian ne’ebé implementa iha futuru,” Nia hateten.
Reportagen Veru Fernandes
