TUTUALA: Autoridade postu Administrativu Tutuala komfirmadu sei hari sentru Merkadu ida iha baliza entre suku Mehara no Suku Muapitin iha tinan 2026. Ho nune’e bele fasilita komunidade sira husi suku Tutuala, Mehara, Muatin no Bauro atu bele fa’an sira nia produtu ba malu,
Administrador postu administrativu Tutuala Carlito Perreira hateten, nia parte identifika ona fatin katak merkadu refere sei loke iha baliza entre postu Tutuala ho suku Muatin nu’udar fatin sentru ba komunidade sira atu bele assesu.
“Postu Tutuala planeia ona sei hare fatin estrateziku para akumula hotu inan aman sira husi Suku Muapitine, Tutuala no Bauro atu mai fa’an sira nia produtu.” Katan nia ba Jornalista Media Lautém-Post.
Relasiona ho kondisaun mini merkadu Tutuala ne’ebe mak la funsiona ona durante tinan 14 iha aldeia Vero, suku Tutuala. Autoridade Postu ne’e hateten kondisaun mini merkadu refere la iha espasu hodi akumula komunidade sira atu fa’an sira nia produtu.
Tanba ne’e nia hateten autoridade postu iha ona planu hodi hari merkadu sentru ida iha baliza entre Suku Mehara ho suku Muapitin atu nune’e bele akumula komunidade sira iha fatin sentru hodi fa’an sira nia produtu ba malu.
“Merkadu la uja ona durante tinan 10 resin, hahu husi 2009 to’o ohin loron. Kondisaun merkadu laiha ona kakuluk hela deit mak nia keranka. Ba futuru ita sei la uja tamba laiha espasu ba inan aman sira atu fa’an sira nia produtu iha ne’eba”. Haklaken autoridade Postu tutuala ne’e.
Autoridade postu ne’e kompromete sei tau kontrusaun merkadu refere sai nudar prioridade Postu Tutuala nian liu husi assebleia postu ba iha Planu Aksaun Annual(PAA) ba tinan 2025, hodi supmete ba iha munisipiu atu bele hetan aprovasaun liu husi conceilhu consutivu municipal.
“Administrasaun postu Tutuala atraves de assembleia postu nian sei tau prioritizasaun ba ida ne’e iha planu 2025 hodi supmete ba konceilhu concultivu nivel munisipal ninian, Wainhira hetan aprovasaun husi conceilhu consutivu munisipal mak merkadu refere sei konstrui iha tinan 2026”. Nia promote.
Iha sorin seluk Abitante Postu Tutuala Linda da Costa husu ba governu liu-liu Autoridade maximo Munisipiu Lautém nian atu bele konstrui merkadu ba komunidade sira iha postu Tutuala. Ho nune’e bele fasilita komunidade hetan rendimentu liu husi atividade negosiu no bele sustenta oan ba eskola.
“Durante tinan 14 ami la asesu ba merkadu, wainhira presija hola sasan ruma ami tenki ba to’o iha kota. Tan ne’e husu estadu loke merkadu ba ami povu Tutuala, nune’e ami bele fa’an ami nia kualker Aihan lokal para bele sustenta ami nia oan sira nia eskola. Tamba ne’e ami presija tebes, Orsamemtu ne’ebe sai ona ne’e tau mos merkadu ida ba postu Tutuala.” katak Linda Ba Jornalista Media Lautém-Post
Iha fatin hanesan Lourenso da Cruz komunidade Postu Tutuala Afirma, alende iha Potensialidade bo’ot ba iha seitor turismu. Tuir nia postu Tutuala mos iha potensialidade bo’ot ba produtu lokal sira seluk, tanba ne’e nia sente merkadu ne’e importante tebes, nu’udar fatin ida propriu ba komunidade sira atu bele fa’an nia produtu lokal ne’ebe sira iha.
“Kona-ba merkadu importante tebes ba komunidade sira atu halo negosiu iha laran, tamba komunidade iha produtu lokal barak mak atu fa’an maibe laiha fatin propriu ba sira atu fa’an.” Dehan Lourenso ba Jornalista Media Lautém-Post.
Reportagen: Veru
Editor: Joenaca Tupa da Conçeicão
