Lospalos: Servisu munisipal Edukasaun Lautém kontinua infrenta problema menus professor iha eskola, sala de aula no ekipamentus ba estudante sira halo pratika.
Hafoin aprejenta progresu servisu tinan 2024 no difikuldade kada eskola nian ba Ministra Edukasaun Dulce de Jesus Soares iha seremonia Natal hamutuk ho professor no funsionariu Edukasaun sira iha jinaziu Lautém Segunda(30/01) foin lalais ne’e.
Director servisu Educasaun Lautém, Anibal Fernande afirma, atu alkansa objectivu edukasaun ba futuru ministeiru presija tenke tau atensaun ba problema ne’ebé edukasaun Lautém hasoru, tamba dadaun ne’e total profesores ne’ebé sei ativo iha ema nain rihun 1, 073 ne’ebé tuir lolos liu numeru ida ne’e maibe profesores nain 85 maka mate, reformadu iha profesores 28, no idade reforma iha 132.
“Eskola iha munisipiu Lautém nian ne’e ita enfreta problema mak menus profesores no sala de aula la too no mos ita nia ekipamentus ba estudante sira atu pratika nian.” katak nia ba Ministra Edukasaun Dulce de Jesus Soares.
Nia hatutan, tamba ita atu hasae kualidade edukasaun ministeriu presija haree ba problema ne’ebé mak kada eskola sira infreta liu-liu profesores sira tamba agora dadaun profesore ne’ebé sei aktivu ne’e hamutuk 1.037 tamba profesores ne’ebé mate hamutuk ema nain 85, reforma iha 28, no mos idade reformadu iha 132.”
Hatan ba preukupasaun ne’e Ministra Educasaun Dulce de Jesus Soares hatete, konaba menus profesores ministeiru halo ona teste bolsa kandidatura iha tinan 2024, no tinan ida ne’e sei iha tan teste bolsa kandidatura ba profesore ensino sekundaria geral no ensino secundario tekniku vokasional.
“Ministeriu edukasaun iha 2024 halo teste bolsa kadidatus ba profesores no halo ona kolokasaun professor, iha 2025 sei halo tan teste bolsu kandidatura ba ensinu secundariu tekniku vokasional, hein katak iha primesiru trimester ita halo teste hein katak iha segundu no terceiru trimeste ita iha ona profesores.” Katak ministra educasaun Dulce de Jesus Soares.
Nia hatutan, kona ba mobiliario nian ne’e, servisu edukasaun munisipal maka menus informasaun ba ministeiru, no infrastrutura bazika ba tinan ida ne’e, nia hatete ministeiru sei konstrui tan eskola hamutuk 14, kompostu husi sala de aula hamutuk 1.900 (Rihun ida atus sia).
“Kona ba mobiliariu ministeriu kontinua sosa se karik iha eskola ne’ebé menus mobiliariu hau hanoin ne’e falta de komunikasaun entre munisipiu ho nivel nasional, logistika ministeriu edukasaun preparadu atu tau mobiliariu ba eskola sira ne’ebé mak sente menus mobiliariu.” Nia informa.
“Tinan ne’e ministeriu edukasaun sei konstrui eskola hamutuk 14, eskola ka sala de aula ne’ebé ministeriu presija ne’e hamutuk 1.900 sala de aula laos ministeriu lakohi halo maibe bazea ba alokasaun orsamentu.” Dehan guvernante ne’e.
Entertantu husi numeru profesors ativo iha munisipio Lautém hamutuk rihun 1.073(Rihun hitu nolu resin tolu), kompostu husi profesores pre-eskolar nain 54, ensino basico 875, ensino secundario 104, ensino tekniku vokasional 40, husi total eskola 143 iha munisipio Lautém , kompostu husi pre-eskolar 51, ensino basiku 83, ensino sekundario 6 no ensino tekniko vokasional 3.
Reportagen: veru.
Editor: Joenaca Tupa da Conceição.
