Lospalos: Ministeriu Administrasaun Estatál (MAE), kuarta-feira ne’e distribui komputadór unidade 34 ba xefe suku 34 iha munisípiu Lautém.
Diretór jerál Dezentrazisaun Governu Lokal Administrasaun, Antonio Agusto Guteres, esplika, komputadór ne’e utiliza ba rejistu dadus populasaun jeográfiku no demografia.
Dadus jeográfiku ne’e dadus kona-ba populasaun nia hela fatin no dadus demográfiku ne’ebé rekolla kona-ba populasaun nia naran, tinan, rasa no kór.
“Komputadór ba suku sira iha Lautém distribui ba suku 34 objetivu distribuisaun ida ne’e uza ba dadus suku nian, liuliu livru 18 ne’ebé iha suku ona dadus monografia, demografia no perfíl suku ida-idak nian.” Nia esplika.
Sekretáriu Munisipal Asuntu Sosial no Organizasaun Komunitaria, Zeferino dos Santos Sequeira, apela ba xefe suku sira hodi utiliza komputadór ho kuidadu nune’e uza ba tempu naruk.
“Sasan sira ne’e, patrimóniu estadu tenke uza ba servisu estadu nian espesiál ba dadus suku sira nian.” Nia husu.
Xefe suku Muapitine, Livio Mendes, agradese ba governu tanba fasilita ona xefe suku sira nia preokupasaun.
“Agradese ministériu administrasaun estatál tanba distribui ona materiál eletróniku no bele fasilita ona suku sira atu halo administrasaun suku nian la’o ho di’ak.” Lider suku ne’e agradese.
Komputadór ne’ebé estatál distribui ba kada suku iha Lautém ne’e ho marka hp.
Sorin seluk, Xefe suku Bauro ” seidauk iha mákina impresora komputadór ami rai de’it”
Hafoin Diretor jerál Dezentrazisaun Governu Lokal Administrasaun estatál, fahe kompradór ba xefe suku sira. Maibé, xefe suku Bauro, Florindo Miranda sente lamentavel tanba la iha mákina impresora atu imprime dadus ne’ebé prodús ona.
Governu sentrál fó ona apoiu ba kada suku sira maibé realidade ne’ebé ohin ami simu komputadór de’it, printer seidauk iha. Ami sei rai de’it komputadór, hein printer mai to’o iha suku depois mak ami uza hodi servisu.” Nia lamenta.
Sekretáriu munisipál asuntu sosiais no organizasaun komunitáriu ,Zeferino dos Santo Sequeira, hateten xefe suku ne’ebé presiza mákina impresora komunika ho autoridade munisipál hodi solusiona.
“Ekipamentus ne’e ministériu administrasaun estatál mak fó maibé tinan ne’e munisípiu la tau orsamentu ba kapitál menór (ba sosa mákina impresora), karik presiza urjente fó hatene ba autoridade hodi rezolve.” Nia fó hanoin.
Jornalista : Veru
Editór : BA
