Lospalos: Fulan oin, kombatentes no martires hirak ne’ebé naran taka sai ona iha lista editál, hahú ona trata rekerimentu ba pensaun iha loron 90 nia laran.
Sekretariu ezekutivu konsellu munisípal kombatentes libertasaun nasionál (CMCLN sigla portugés) munisípiu Lautem, Acasio Fini Ponta Leste informa, katak kombatentes no martires ne’ebé naran taka sai ona iha lista editál iha segundu rejistu ne’e, sei hahú trata rekerimentu ba pensaun iha loron 90 nia laran. Ne’ebé sei hahú husi fulan-Abril to’o fulan-Jullu tinan ne’e.
“Fulan Abril nia laran mós sei kontinua rekerimentu ba pensaun, ba sira ne’ebé naran taka iha lista editál sira sei hatama Rekerimentu ba pensaun hahú iha fulan-Abril to’o 31 fulan-Jullu tinan ne’e nian”. Dehan nia ba Jornalista Lautem-Post iha nia knar fatin, foin lais ne’e.
Tanba ne’e, nia dehan, husu ba kombatentes no martires ka nia família bele mai hatama ona rekerimentu pensaun iha loron 90 nia laran, hahú husi fulan-Abril to’o fulan-Jullu tinan ne’e.
Sekretariu ezekutivu ne’e esklarese, katak atu prosesa rekerimentu ne’e bazeia ba kombatentes no martires, inklui sobre vivensia sira-nia eskalaun.
“Lista editál taka sai ona, sira bele mai halo prosesu rekerimentu tuir nia kriteriu ida-idak. Kuandu nia simu ninian rasik, tanba iha pensaun espesiál ba reforma grau 1 eskalaun 1, ba 20 to’o 24 ho nia kriteriu rasik, pensaun espesiál reforma 15 to’o 19 ho nia kriteriu rasik, no mós ho 8 to’o 14 hamutuk ho sobre vivensia sira.” Nia esplika.
Jornalista: Veru
Editor: Joenaca Tupa da Conceicao.
