Lospalos: Negosiante sira iha merkadu munisipál Lautem, sente preokupadu ho merkadu munisipál ninia espasu venda ne’ebé kloot ba beibeik.
Negosiante Tereza Dos Santos Ximenes, argumenta, governu presiza tau matan ba kondisaun merkadu munisipál, nune’e vendedór sira bele utiliza ho seguru.
Merkadu munisipál Lautem, oras ne’e la.iha ona espasu sufisiente, tanba ne’e, vededores fa’an fali produtu iha espasu ne’ebé kompradór liu ba no mai hodi sosa produtu.
“lolos ne’e vendedór tuur iha ida-idak nia liña hodi fa’an sasán. Ne’e governu mak tenke kontrola. Agora ne’e tuur sabraut loos. Terminál mós okupa hodi fa’an sasán” vendedóra ne’e lamenta.
Diretu servisu munisipál komérsiu indústria munisípiu Lautem, Cornelios Barreto hatán, konstrusaun merkadu munisipál Lautem ne’e iha hela prosesu avaliasaun husi Centru Nasionál dé Aprovizionamentu (CNA) no hein de’it atu fó sai rezultadu konkursu.
Modelu konstrusaun merkadu foun ne’e, nia hateten, iha uma unidade tolu inklui estasionamentu.
“Konstrusaun merkadu tender loke hotu ona iha fulan kotuk, agora daudauk prosesu iha ona Centru Nasionál dé Aprovizionamentu (CNA) tanba ne’e grade projetu parte CNA sei halo avaliasaun tanba iha fulan kotuk karta ba iha ministériu atu hare no hetan ona resposta haruka ona ba CNA mak iha direitu atu fó sai rezultadu.
“Tuir dezeñu ne’ebé sei halo unidade tolu aumenta ho fatin para nian, ita presiza fizikamentu hektar 2 liu, iha laran hotu karreta para fatin.” Nia hakotu.
Entretantu konstrusaun merkadu munisipál ne’e Ministériu Comersiu Industria (MCI) serbisu hamutuk ho Ministériu Administrasaun Estatál (MAE) liu husi autoridade munisípiu prevee orsamentu hamutuk millaun 8 resin.
Jornalista : Veru.
Editór : B.A.
