Lospalos: Ahi han mutuk uma-lulik hosi lisan Kabuneru iha adeia Liarafa, suku Vairoke, Postu Luro, munisípiu Lautém, iha loron kinta (19/10) ne’e, maizumenus tuku 14:00, meudia
“Inséndiu ne’e akontese iha tuku 14:00, meudia, maibé laiha ema ruma kanek no lakon vida, mais sasan uma laran no sasan lulik iha uma lisan laran mak la salva hotu tamba ahi maka’as liu no konsege halo mutuk hotu,” informa Na’in ba uma-lulik , Domingos Gusmão Pereira, ba Lautem Post.
Motivu hosi inséndiu ne’e, nia dehan la hatene tanba sira iha iha to’os derepente ahi han uma-lisan ne’e mak vizinu sira bolu sira mai, maibé to’o mai uma-lisan no sasan lulik ne’ebé rai iha uma ne’e motuk hotu.
Iha biban hanesan, Xefe Aldeia Liarafa, Agostinho Da Costa husu ba Autoridade Protensaun Sivíl (APC,sigla Portugés) munisípiu Lautem atu fó apoia emerjénsia ba família afetadu tanba vitima sira nia sasan ahi han mutuk hotu.
“Husu ba autoridade protesaun sivil atu fó apoia emerjénsia ba vitima sira tanba sira nia sasan ahin han motuk hotu”, Autoridade lokál ne’e sujere.
Relasiona ho inséndiu ne’e, Komandante APC Lautem, Inspetór Xefe Polísia, Tito Da Silva, hateten hafoin akontesimentu ne’e autoridade suku Wairoke informa kedas ba parte APC, nune’e tun direta hodi haree no fó apoia emerjénsia.
“Ita apoia ona sasan emerjénsia ba vítima, maibe materiál konstrusaun parte APC la halo tanba estragu uma lisan ne’e Sekretáriu Estadu Arte no Kultura nia resposabilidade.
Entretantu, Autoridade Protesaun Sivil (APC) hamutuk ho Cruz Vermelha Timor Leste (CVTL) ho Chatolic Relief Service (CRS) ba ona terrenu hodi apoia sasan emerjénsia hanesan food item no non food item ba família afetadu.” Katak nia
Reportagen: Veru Fernandez.
Editór: Helefatil
