Lospalos: Komunidade munisipiu Lautem sei selebra loron finadu, iha loron 2 novembru, nune’e PNTL Lautem nafatin asegura seguransa ba komunidade hotu atu selebra loron matebian ho hakmatek.
Komandante PNTL Munisipiu Lautem, Superintendenfe Polisia Antonio Rego Fernandes hateten PNTL nafatin preparadu hodi fo seguransa ba komunidade iha Lautem.
“Ita servisu nafatin atu fo seguransa masimu ba loron finadu ne’ebe monu iha loron 1 no 2. Ita hotu hatene katak komunidade husi fatin seluk mai hodi vizita semiteriu hodi kari aifunan tanba ne’e ita iha ona planu propriu para fo seguransa ba movimentu husi Dili mai Lospalos no mos husi Lospalos ba sira nia knua”, hatete Komandante ne’e ba Lautem Post.
Komandante ne’e profunda finadu la’os tempu atu hemu tua, maibe loron
importante ba matebian sira hodi halo reflesaun hodi dignifika sira.
“Loron finadu laos tempu patu hemu tua too lanu, maibe loron finadu hanesan parte ida atu ita halo reflesaun hodi dignifika matebian sira, oinsa dignifika sira nia mate, ita kari aifunan mos tuir prosedimentu kultura no mos prosedimentu kan fiar relijiaun nian. ida ne’e mak sai fator determinante atu bele ba iha rate sira. maibe laos ba rate hemu tua atu baku malu”, nian afirma.
Tanba ne’e, nia dehan PNTL sei la tolera komunidade Sira ne’ebe ba hemu tua to’o lanu iha rate no baku malu fali.
Reportagen: Veru Fernandez
Editor : Helefatil
