Lospalos- Hafoin eleisaun suku iha loron 28 fulan Outubru, suku 16 iha munisipiu Lautém mak tenke hakat ba ronda daruak, tanba kandidatu xefe suku la hetan votu maioria (la hetan votu 50+1) husi total votantes.
Director Servisu Tékniku Administrasaun Eleitorál (sigla portugés STAE ) munisípiu Lautém, Sergio Belmonte, hateten, tékniku STAE prepara ona sentru votasaun 80 iha suku 16 ne’ebé nia kandidatu xefe suku hakat ba ronda daruak.
“STAE organiza tékniku hodi prepara lojistiku to’o loron ikus (dia 12/11/2023), hodi distribui ba sentru votasaun 80 iha aldeia ne’ebé mak hola parte ba suku 16 ne’ebé mak sei uza ba iha ronda daruak” dehan Director Servisu Tékniku Administrasaun Eleitorál, Sergio Belmonte, Tersa, (07/11).
Suku 16 ne’ebé hakat ba ronda daruak, postu administrativu Luro iha suku 6, Lospalos iha suku 5, postu Loré iha suku 2 no postu Tutuala hamutuk suku 3.
Husu kona-ba total eleitores ba ronda daruak, dirizente STAE ne’e labele relata dadus fixu tanba la iha baze dadus eletróniku.
“Munisípiu Lautém jerálmente total eleitorál la iha dadus fixu tamba ita nia sistema atividade hanesan eleisaun suku, fasilita de’it rejistu manual para depois hola parte ba iha prosesu utiliza kartaun eleitorál de’it” nia esplika.
Reportajen : Ressy Costa.
Editor : Black Angel
