LOSPALOS: Maioria Komunidade iha Munisipiu Lautem preokupa ho atendimentu registu Notariadu nian, tamba ne’e sira husu ba parte relewante atu hadia sistema atendimentu ne’e ba digital hodi atende ho lais.
Problema ne’e levante husi Komunidade sira iha Munisipiu Lautem, hafoin forma hodi trata sira nia dokumentus hanesan pasaporte ne’e.
Ho ida ne’e, Aplikante Elia’a Vong husu atu hadia sistema atendimentu ho modelu Digital tamba tempu agora iha ona telemovel nune’e bele fasilita liu husi telemovel sira.
“ami biasa mai urus dokumentus ami sempre demora ami sempre forma oras rua, tolu mak foin atende ami, nee’be ami husu hadia sistema ne’e sebele muda ba modelu digital tamba tempu agora labarik sira mos iha ona telefone sebele karik halo oinsa atu fasilita liu husi telefone”, katak Elia’a ba jornalista Lautem Post, Sesta 23/11/2023.
Nia akresenta registu liu husi via telemovel fasil ba sira no bele hatene tempu no oras hodi mai trata ho lalais nune la estraga tempu hodi forma.
“Ita hare agora modernu liu ona nebe ami registu se bele liu husi telefone atu nune ami hatene oras para mai ami lansung tama kedas par labele estraga tempu hodi hein antrian, tamba atendimentu nee tinan sanolu ba kotuk mos hanesan, agora era digital maibe lakohi aproveita digital ne’e mak ami senti triste ituan”, nia esplika.
Preokupasaun ne’e hetan resposta kedan husi Director Munisipiu Conservatoriu Servisu Registu Notariadu Munisipiu Lautem, Amandio Alves Gomes hateten iha ona planu atu kria aplikasaun ajendamentu hodi fasilita Timor oan sira hodi asesu ajendamentu liu husi via telemovel nune labele forma iha Edifisu Notariado ne’e.
“iha ona hanoin husi Diresaun Jeral atu kria aplikasaun ho ajendamentu tamba ida ne’e bele fasilita Timor oan sira bele asesu ajendamentu liu husi telefone, para labele mai forma iha DiresaunMunisipal sira, ema aplika iha uma to’o nia tempu mak mai foti”, nia hatan.
Nia informa ba komunidade Lautem, situasaun mak hanesan ne’e, tamba ne’e iha ona planu ba futuru atu aplika sistema ajendamentu hodi halo atendimentu publiku liu-liu serbisu Notariadu nian.
“atu informa ba komunidade liu-liu Munsipiu Lautem katak, situasaun mak nune’e, iha planu ba futuru atu aplika sistema ajendamentu ne’e ba atendimentu publiku liu-liu passaporte, no servisu notaria nian hotu iha Diresaun ne’e, maibe tenki iha apoiu politiku para depois bele dezenvolve sistema ne’e atu nune’e komunidade bele uja sistema ne’e par labele forma iha eskritoriu”, nia informa.
Diretor ne’e mos husu ba diresaun jeral atu prepara fatin ba komunidade sira tamba laiha mahun ba sira no laiha kadeira atu komunidade sira tur hodi trata dokumentus, tamba ne’e atu koalia konaba atendimentu dignu parte hanoin seidauk to’o.
Maibe ho informasaun hanesan ne’e nia parte hanoin ajuda tebes nain ulun sira atu hare asuntu sira ne’e, hanesan sira mai forma fatin laiha atu tuur, kuando tempu udan laiha uma ida atu sira iha laran, no forma iha loron manas ne’e.
Jornalista : Veru Fernandez
Editor : Saqhalista
