LOSPALOS: Servisu Rejistu Notariadu munisípiu Lautém hahú reativa atendimentu ba populasaun ne’ebé hakarak halo dokumentun ka passaporte.
Diretór Munisípiu Konservatoriu Servisu Registu Notariadu Lautem, Amandio Alves Gomes, informa daudaun hahú fó atendimentu ba komunidade ne’ebé hakarak halo passaporte bazea desizaun husi Ministru Justisa no Diretór Jerál Serbisu Notariadu Nasionál hodi fó biban ba munisípiu sira.
“Atendimentu ba passaporte iha Lautem hahú, loron kuarta (22/11), nune’e nia husu ba komunidade sira ne’ebé hakarak halo passaporte bele hakbesik an ba notariadu Lautem”, Diretór ne’e hatete ba Lautem Post, sesta ne’e.
Mekanizmu atendimentu ne’e nia dehan lala’ok hanesan uluk sei imprime iha Dili no tipu passaporte tuir nia durasaun ho kustu.
“Ita nia komunidade mai hasai foto ba passaporte mak foin ba imprime iha Diresaun Jerál Dili ne’ebé ho passaporte ho tipu $50 nian ho nia durasaun tempu foti iha loron 10 nia laran, bele atende ba loron tolu nian ho nia presu $75,” nia afirma.
Mekanizmu foti kaderneta passaporte, nia informa ba loron 10 nian funsionaláriu registu sivil munisípiu mak ba lori mai hodi fó ba aplikante sira, enkuantu ba loron tolu nian aplikante bele lori resivu hodi foti iha Dili.
“Ita fó de’it dokumentu hanesan fotokopia formuláriu ne’ebé hasai foto impreme ka kopia tau hamutuk ho resivu sira rasik bele ba foti iha Dili. Aplikante sira la forma hanesan hirak ne’ebé trata maibé bá hatama de’it resivu iha kaixa ne’ebé preparadu hodi hein foti,” nia afirma
Diretór ne’e mós husu ba komunidade munisípiu Lautem ne’ebé iha Dili atu bele mai trata iha munisípiu tanba kada loron trata ema na’in-50.
Entretantu, atu trata passaporte ho durasaun loron sanolu ho kustu $ 50, loron tolu ho kustu $75 no loron ida ho kustu $100.
Reportagen: Veru Fernandez
Editór: Helefatil
