LOSPALOS : Xefe suku sesante husi Suku Bauro Cidalio Freitas parabeniza Xefe suku eleito Flrorindo Miranda ne’ebe mak simu ona posse iha loron 28 fulan Novembru. Alen de ne’e nia mos agradese ba entidades hotu ne’ebe mak kopera ona ho nia hodi kontribui ba suku Bauro durante tinan 7 iha nia mandatu.
“hahu husi loron 28 de novembro 2023 termina ona ami nia mandatu nu’udar membro konselhu suku ne’ebe eleito iha tinan hitu liu ba, hakarak hato’o hau nia agradesimento e obrigado wain ba entidades hotu- hotu, governu, agensia ne’ebe hamutuk hodi lori dezenvolvimento ba ita nia povo no komunidade.“dehan nia ba Lautem-Post iha nia diskursu foin lalais ne’e(28/11).
Xefe suku sesante ne’e mos husu atu Xefe suku eleito no reeleitu sira bele kontinua ho boa vontade nafatin hodi sai servidor ne’ebe diak iha ida-idak nia suku no aldeia.
“Nu’udar xefe suku sesante hau nia lia menon ba xefe suku re- eleito no eleito, atu nafatin koragen, iha vontade atu sai servidor diak ba ita nia povo no komunidade tomak bom trabalho no bom suseso.” Tenik Autoridade lokal sesante ne’e
Alen de ne’e nia rekomenda ba autoridade munisipal sira, liu husi programa Planu Investimento Munisipal (PIM) hodi husu ba governo dasia atu bele tau orsamento ba progaram ne’e, hodi nunee sefe suku eleitu sira bele iha k’bit hodi lori dezemvolvimento ba iha niavel suku.
“Hau rekomenda ba governo foun atu tau orsamentu iha (PIM) no (PNDS) nian para depois xefe suku eleito bele halo sira nia funsionamento atu lori dezenviolvimento komunidade iha suku ida- idak.”katak Cidalio.
Iha sorin seluk Administrador Municipiu Lautem Domingos Savio mos husu atu xefe suku eleito no re-eleito sira bele esforsu an didiak hodi servi komunidade hodi implementa dezenvolvimentu iha suku ida idak, tamba tuir nia municipiu Lautem sei simu dezentralizasaun. Tamba ne’e nia husu atu sefe suku ho konselhu suku sira bele kopera malu hodi implementa dezenvolvimentu iha baze.
“Ba xefe suku eleitu no re eleitu sira tenki esforsu an didiak hodi servi komunidade sira iha kada suku. Hodi implementa dezenvolvimentu, tamba municipiu Lautem sei simu programa dezentralizazaun. Tamba ne’e ba sefe suku sira ho nia konselhu suku tenke kopera malu hodi implementa dezenvolvimentu iha baze.” Apela Lider Munisipiu ne’e.
Alen de ne’e administrador subliña liu tan, atu xefe suku eleito sira bele kontinua halo nafatin kordenasaun servisu ne’ebe diak ho xefe suku sesante sira, ho nune’e bele garante no lori dezenvolvimentu iha kada sucu no aldeia.
Reportagen: Ressy costa
Editor: Joenaca Tupa da Conceição
