LOSPALOS: Ministru Pretroleu no Minerál (MPM), Francisco da Costa Monteiro, ne’ebé prezide serimónia komemorasaun loron aniversáriu Proklamasaun Unilaterál Independénsia ba dala-48 (28 Novembru 1975 -28 Novembru 2023), iha resintu administrasaun Munisípiu Lautém.
Proklamasaun Unilaterál Independénsia ba dala-48 ho tema ” Hametin Unidade independensia Nasionál hodi haburas dezenvolvimentu iha Lautem no fó onra ba Luta na’in sira, fundador no ba Martires Libertasaun Nasionál sira ne’ebé integra ona nasaun ba ita ho liberdade no soberanu”.
Iha diskursu, Ministru Petróleu no Minerál Francisco da Costa Monteiro, hateten iha komemorasaun loron proklamasaun independensia ne’e ema hotu atu re-lembra fali prosesu luta ba ukun rasik aan, tanba liu husi prosesu funu naruk ema barak sakrifika nia vida mak Timor-Leste hetan Liberdade.
Governante ne’e mós husu ba Lautem-oan atu promove pás no estabilidade hodi partisipa iha prosesu dezenvolvimentu
“Husu ba joven sira atu banati tuir prinsÍpiu luta na’in sira nian hodi koontribui ba dezenvolvimentu. Ita nia luta na’in sira alkansa ona sira nia prinsÍpiu luta libertasaun nasionál mak liberta ona patria, nune’e ita presiza unidade hodi hamutuk luta ba povu nia moris di’ak,” nia afirma.
Entrentantu, seremónia komemorasaun hetan seguransa la’o di’ak no hetan partisipasaun másimu husi veternu, funsionáriu, inan no aman, juventude no labarik sira.
Reportagen: Veru Fernandez
Editór: Helefatil
