LOSPALOS- Papa Francisco iis kotu iha segunda, (21 Abríl 2025) ne’e ho idade 88.
Novidade triste ne’e anúnsiu husi Sua Eminénsia, Kardeál Camerlengo Farrel husi Casa Santa Marta.
Papa Francisco hakotu iis iha dader, tuku 7:35, oras Vatikanu-nian. No iha tuku 13:35 oras Timor-nian.
“Iha tuku 7:35 ohin dadeer, Bispu Roma nian, Francisco, fila hikas ba Padre nia uma. Ninia moris tomak dedika ba servisu Na’i nian no Kreda nian”, anúnsiu Kardeál Farrel.
Iha Kardeál Farrel nia anúnsiu katak : “Nia (Papa Francisco) hanorin ita atu moris valór sira Evanjellu nian ho fidelidade, aten-brani no domin universál, liuliu iha favór ba sira ne’ebé kiak liu no marjinalizadu liu”.
Iha nota refere: “Ho agradesimentu boot ba ninia ezemplu nu’udar Na’i Jezús nia dixípulu loloos, ami hahii Papa Francisco nia klamar ba Maromak Trindade nia domin mizerikórdia rohan-laek”.
Papa Francisco mosu iha varanda Bazílika São Pedro nian iha domingu horisehik, hodi hato’o mensajen ikus Páskua Urbi et Orbi ba Kreda no mundu.
Ekipa Lautem Post
