LOSPALOS: Diretora programa ADRA Marcelina Passaribu haktuir, kuidadu no proteje meiu ambiente nu’udar responsabilidade interjerasionais (husi jerasaun ba jerasaun), tanba kuidadu ambiente laos deit heransa ne’ebe ita simu husi beila sira maibe hanesan mos tusan ne’ebe ita impresta husi jerasaun sira ne’ebe sei tuir mai.
Tuir nia se ita nungka fó ita mos nungka simu fila fali, tanba kuidadu ambiente laos ita fó deit ba ema seluk maibe fó fila fali ba ita nia rasik.
“Konaba ambiente ita hotu sente katak iha Dili hahu ona manas tebes, sei ita la uja AC ka ventuñas ita sente toba ladiak, iha Lospalos ita sei sente malirin no fresku los maibe ida ne’e laos permanenete se ita la kuidadu ambiente.” Dehan nia relasaiona ho selebrasaun loron Internasional meiu ambiente iha Munisipiu Lautém foin lalais ne’e.
Nia hatutan tan, Iha tinan kotuk progetu Bee ba komunidade nian iha Munisipiu Lautém ADRA tenke muda fali fatin, hafoin suvei fatin no halo BOQ ba progetu nian tanba bee matan ne’ebe identifikadu iha possibilade bele maran wainhira uja ba tempu naruk.
“Hafoin ami halo estudu ba bee matan ne’e afinal nia maran, entaun ami tenke muda fali ba bee matan seluk ne’ebe mak la maran. Entaun ida ne’e sei akontese no ita sei hasoru barak liu se ita la tau matan ba ita nia ambiente.” Nia esplika.
Diretora pograma ADRA ne’e subliña, kuidadu ambiente hanesan mos relasaun entre ema ho ema, tanba wainhira ema la kuidadu ambiente nia mos sei la simu fila fali husi ambiente.
“Ba hau relasaun ho meio ambiente ne’e hanesan relasaun ema ho ema, se karik ita nunga fó ita nungka bele foti, kompara ba banku karik hanesan ho ATM. Se ita nungka kontribui ba ita nia saldo wainhira ita ba dada fila fali saida mak akontese osan laiha tanba ita nungka rai osan iha laran.” Nia argumenta
“Sei ita kuidadu meio ambiente laos ita fó ba ema seluk maibe ita fó ba ita nia an rasik, tanba ambiente ne’e laos hanesan heransa ne’ebe ita simu deit husi ita nia bei ala sira maibe ida ne’e hanesan tusan ida ne’ebe mak ita impresta husi ita nia gerasaun sira ba futuru nian.” nia hatutan tan
Diretora nee hateten, se ita la taumatan ba ambiente, modellu ambiente saida mak ita sei husik hela ba ita nia jerasaun atu bele moris iha tempu naruk ne’ebe sei mai.
“Ida ne’e mak prinsipiu ida ne’ebe mak ita tenke komprende kona ba ita nia relasaun ho ambiente.” Tenik Marcelina.
Iha sorin seluk Secretário Estado das Florestas (SEF, sigla Portugês) Fernandino Vieira hateten, Guvernu Timor-Leste kontinua iha komitmentu atu nafatin fó proteksaun ba iha meio ambiente ho nune’e bele kontinua prezerva nafatin bee matan sira ne’ebe mak dadaun ne’e iha.
Tuir nia bee hanesan komponente ida ne’ebe vital tebes ba ema nia moris, tanba ne’e nia husu atu ema hotu bele taumatan ba ambiente hodi bele konserva bee ba tempu naruk.
“Ita hatene katak bee ne’e hanesan komponente ida vital teb-tebes ba ema nia moris, tanba ne’e presiza iha protesaun no konservasaun ba ita tomak. Tanba ne’e ita hotu iha dever no obrigasaun moral hodi bele fó protesaun ba ita nia ambiente.” Katak Guvernante ne’e
Entratantu Objetivu husi Implementasaun Progetu konservasaun bee no ambiente iha Lautém mak atu hasae konsiensia komunidade nian hodi foti aksaun lokal ruma, hodi nafatin konserva ambiente no proteje bee matan sira atu labele menus no maran tanba gerasaun futuru sei nafatin kontinua presija bee ba moris nain.
Liga ho implementasaun progetu ne’e ADRA sei kontinua desimina informasaun ba komunidade inklui fahe ai horis ba komunidade hodi bele kuda iha suku targetu hamutuk 6 iha munisipiu Lautém.
Ho nune’e bele satan netik udan been hodi karrega fila fali iha bee matan sira, atu nune’e bele evita udan been ne’ebe halai liu deit hodi provoka fali erozaun no inundasaun iha tempu udan wainhira la iha aihoris.
Reportagen: Ekipa Media Lautém-Post.
Editor: Joenaca Tupa da Conceição.
