LAUTEM: Bee-matan sei maran iha tempu bailorin, bainhira la iha ai-horis ne’ebé moris haleu hodi fó oxijenio.
Organizasaun non governamental, ADRA Timor-Leste ho komunidade no autoridade lokál kuda ai-oan iha suku serelau hodi proteze bee- matan.
Responsavel projetu ONG ADRA, Isac Sarmento, hatete, programa kuda ai-oan, nu’udar preparasaun hodi hasoru mudansa klimatika iha futuru.
” Programa ne’e atu eleva koñesimentu komunidade nian konaba prevensaun mudansa klimatika. Tuir estudu, posibilidade Timor sei hasoru bailoron naruk no udan been mai la tuir nia tempu .” Responsavel programa esplika, (19/09).
Parte ADRA apela ba komunidade sira, tau atensaun ba ai-oan ne’ebe kuda ona iha bee matan sira, nune’e bele buras.
“Agroflorestasaun ne’e hanesan asaun pozitiva ne’ebé ita halo. komunidade sira presiza tau atensaun ba ai-oan ne’ebé kuda ona iha bee matan.” nia dehan.
Xefe suku serelau, Jeremias Sousa, husu ba komunidade sira, atu kuida nafatin ai-oan ne’ebé kuda ona iha bee-matan, nune bele projete bee- matan.
” Reflorestasaun ne’e, atu prezerva bee-matan, nune’e labele maran. Tamba ne’e, husu ba komunidade, kuidadu ai horis nebe ita kuda ona”, lider komunitáriu husu.
Administrador postu administrativu Lautém, Anacleto Fernandes Xavier, agradese ba ong adra nia programa tamba servisu ho komunidade hodi konserva bee-matan.
” Espera katak ho prezensa adra nian sei fo benefisiu ba futuru diak liu tan.” Administrador nia esperansa.
Total ai-oan ne’ebé kuda, hamutuk hun 150, ne’ebé kuda iha bee matan, Capuk ira, Panaratu no Ajan ara.
Reportagen: Veru.
Editor : Black Angel
