Lospalos: Asosiasaun Feto Lautém (AFEL) dúvida ho Prezidente Autoridade Lautém nia polítika kona-ba empoderamentu feto tanba estrutura PAM Lautém atuál, feto ida de’it mak sai diretora ba servisu munisipál planeamentu.
Prezidente Assosiasaun Feto Lautém, Maria Ligia de Fátima, sente triste tamba iha serimónia tomada de pose prezidente autoridade munisipál ho nia estrutura laiha balansu igualidade jéneru.
“Haree iha pakota ida ne’ebe bo’ot maibé feto ida de’it mak iha laran, assosiasaun feto iha munisípiu, ha’u sente dúvida, la hatene ba oin ne’e atu promove feto ka la’e” feto poténsiál ne’e dúvida.
Ligia hateten, Prezidente Autoriedade Munisipál Lautém promete liuhosi nia diskurs katak, sei promove igualidade iha seitór hotu-hotu maibé ekipa emposada ne’e laiha balansu ba igualidade jéneru.
“Ohin ha’u akompaña iha diskursu sira. PAM atual no Vice MAE ko’alia furak, katak presija promove igualidade iha seitór hotu-hotu maibé na realidade ohin ita hare feto ida de’it”, nia lamenta.
Konaba mane na’in 3 iha estrutura laran maibé la tuir toma posse, Lizia dehan, troka de’it ho feto seluk.
“Ha’u sujere, se sira la toma pose katak labele sai legal, entaun sei iha oportunidade atu halo aprosimasaun ho feto maluk sira atu bele okupa fatin ne’e” feto potensiál ne’e sujere.
Hatan ba lamentasaun ne’e, Vice ministru Admimistrasaun Estatál, Jacinto Rigoberto de Deus, informa, feto potensiál iha munisípiu Lautém barak tanba ne’e sei tau fó oportunidade hodi okupa kargu seluk.
“Haree katak iha Lospalos feto ida de’it maibé, ha’u haree Lospalos oan feto matenek mós barak. Tuir mai feto nia papél no nia partisipasaun ita sei konsidera”, nia hatán.
Reportagen: Veru.
Editor : B.A
