Losplos: Bazeia ba Dekretu Lei no 33/2008, 27 de Agostu kona-ba ijiene orden públika hodi garante ambiente saudavel, tanba ne’e, administradór postu Lospalos husu komunidade sira atu sulan animal hakiak, nune’e labele hafo’er sidade.
Administrador Postu Administrativu(APA), Lospalos Olderico Coimbra, dehan, ekipa administrasaun sei oho animal hakiak ne’ebé la’o livre hodi hafo’er sidade.
“Ita fó ona informasaun ba komunidade sira komesa halo luhan ba animal sira maibé kuandu sira lakohi koopera, pasiénsia ita sei oho, purké ita konsidera laiha na’in”, administradór apela.
Administradór fahe ona informasaun kona-ba dekretu lei ijiene no orden públika, nune’e labele estraga komunidade nia plantasaun.
Jornalista Lautém-Post observa iha terrenu, animal kontinua la’o livre iha kampu 28 de Novembro Lospalos, diresaun Hamamoko no kampu Futebol Lospalos.
Reportagen: Veru.
Editor : BA
