Lospalos: Administrador Postu administrativu (APA) Lospalos no Tutuala kontinua utiliza kareta estadu ho kondisaun aat hadi kontinua halo atendimentu ba komunidade sira.
“Kareta kondisaun la favoravel ona, tamba ho espiritu lideransa laos gestaun ba Administrador Postu maibe tenki serbisu no atende duni komunidade sira tama too aldeia isoladu sira mesmu dala ruma failha iha dalan.” dehan APA Lospalos Olderico Coimbra ba Jornalista Lautém-Post.
Autoridade postu ne’e hateten, wainhira kareta postu nian aat, nia uja rasik motor hodi halo serbisu atendimentu ba komunidade sira.
“Se la-bele liu ona alternativu mak ita bele uja motor privadu, durante hau nia mandatu kareta failha dala tolu ona, ne’ebé hau uja hau nia motor privadu hodi servsiu.” Nia komfesa.
Iha sorin seluk Administrador Postu Administrativu (APA) Tutuala Carlito Perreira haktuir, katak kareta refere tuir lolos tama ona iha prosesu leilaun maibe tamba nesesidade obriga tenki utiliza duni hodi halo serbisu.
“kareta ne’e tinan 2009 nian no tau ona estiker atu ba leilaun nian, tamba ita haree ninia kondisaun tuir lolos labele uja ona soke ita la uja entaun ita auguenta.” katak APA Tutuala Carlito Perreira ba Jornalista Lautém-Post.
“Iha 2025 karik iha kapital minor tuir PAA (Planu Asaun Anual) nian karik bele hola ba kareta rua ida ba postu Lospalos no Tutuala nian.” Nia husu.
Hatan ba ne’e, Prezidente Autoridade Munisipal (PAM) Lautém Melio de Jesus konfirma iha ona planu katak tinan oin sei tau orsamentu hodi responde kareta ba postu Lospalos no Tutuala nian tamba postu 4 seluk iha ona.
“Planeia ona atu tau orsamentu iha 2026 nian atu sosa kateta rua ba postu administrativu Tutuala ho Lospalos, ne’ebé hakarak ka lakohi ami tenki sosa tamba postu 4 hola ona hela postu rua.” Nia kompromete.
Reportagen: Veru.
Editor: Joenaca Tupa da Conceição.
