Lospalos: Komunidade Lautém preokupa ho stok kaixaun funebre nian ne’ebé mak dadaun ne’e mamuk iha armagen servisu munisipal asaun social SMAS Munisipiu Lautem nian ne’ebé mak hotu ona hahu husi fulan Agusto liu ba.
Komunidade Lospalos Fini Ponta Leste hateten kaixaun ba mate isin nian ne’ebé governu prepara iha munisipiu Lautém dadaun ne’e laiha ona, tamba ne’e nia husu ba parte relevante sira atu tau atensaun hodi hare ba asuntu ne’e.
“Liga ba kaixaun tuir ami nia observasaun foin dadauk kareta baku fila iha sucu Com ema nain rua mate sira presija kaixaun maibe iha diresaun asaun social iha momentu ne’ebé kaixaun laiha”. Esplika Fini ba media Lautém-Post.
Liga ho assuntu ne’e Fini Ponta-Leste husu ba autoridade kompetente sira atu bele tau atensaun ba problema kaixaun ne’ebe mak dadaun ne’e laiha ona iha fulan Agustu liu ba, liu husi orsamentu munisipiu nian ne’ebe mak hetan ona aprovasaun iha Parlamentu.
“Husu ba ukun nain sira presija hare ba situasaun ida ne’e. Orsamentu ba munisipiu karik passa ona husu ba autoridade kompetente serbisu hamutuk ho entidade hotu-hotu hare ba asuntu sira ne’e, pelu menus sira nia mate ne’e nia kaixaun ita prepara ba iha ultimu homenagen sira bele toba iha fatin ne’ebe dignu.” Nia hatutan tan.
Hatan ba ne’e diretur servisu munisipal asaun social SMAS Advento Jeronimo hateten kaixaun ne’ebé governu prepara iha tinan ne’e hamutuk 33 hodi ajuda komunidade sira wainhira presija maibe, maibe dadaun ne’e laiha ona tamba hotu desde fulan agusto liu ba.
“Orsamentu ba kaixaun nian 11 mill resin deit, tamba ida ne’e mak kaixaun ne’e hetan 33 deit. Hodi ajuda ba kbiit laek sira. Agora dadaun hotu ona iha fulan agusto kedan tamba orsamentu ne’ebé iha husi 2023 ba 2024 mak kiik.” Nia argumenta.
Diretur SMAS ne’e afirma dadaun ne’e MSSI Lautém mak apoiu kaixaun wainhira komunidade presija, nia hateten tamba ne’e tuir planu iha 2025 nian ne’e SMAS sei propoin atu aumenta volume kaixaun mai iha munisipiu Lautém.
“Komunidade husu hela deit ne’ebé foin dadauk mate iha Com ami husu fali social mak ajuda. Agora dadauk sosial ajuda tan 49 maibe kaixaun kiik. Ho metru 1,30 bo’ot laiha, maibe ita rai hela iha armagen presija ita apoiu”. Katak diretur SMAS ne’e.
“Proposta 2024 nian iha kaixaun 33 agora ne’e sae ba 44 ami nia metas ne’e too 100 tamba bazea ba ami nia estudu komparativu so munisipiu Lautém mak kaixaun kiik. Hotu hotu ne’e 100 ba leten. Maibe ami sei hatoo ba ami nia boot sira oinsa para hasae kuantidade kaixaun.” Diretor ne’e hatutan.
Entretantu bazea ba planu aksaun anual (PAA) 2025 nian husi servisu munisipal asaun social sei propoin orsamentu hamutuk 14 mil 400.00 ba produsaun kaisaun hamutuk 44, no sei loke ba publiku liu husi prosesu tenderizasaun.
Reportajen: Veru.
Editor: Joenaca Tupa da Conçeião.
