Lautem: Atu Selebra Loron International Oseaniku no kampaña internasionál ba ekonomia Azul (Blu Economic), Autoridade Lautem sei Organiza Festival Jaco Island ho nia tema “Ha’u-nia Tasi ha’u-nia Timor”, hodi organiza komunidade tomak atu halo atividade limpeza jerál ba tasi ibun no sidade laran, inklui organiza kampaña no eventu munisipál sira liga ba kuidadu tası durante Loron 8 iha munisípiu Lautem.
Prezidente Autoridade Municipal (PAM) Lautem, Melio dé jesus, konfirma, tuir kalendáriu Munisipal nian ne’ebé fó sai, katak selebrasaun ba loron internasionál oseaniku iha munisípiu Lautem ne’e sei hahu ho kampaña nasionál ba tasi ne’ebé ligadu ba iha ekonomia azúl, iha loron 1 fulan Juñu no nia finál sei taka iha loron 8 fulan Juñu ne’ebé monu ba iha loron mundiál oseaniku ninian.
Tuir nia, loron dahuluk sei hahú uluk loron rua husi postu administrativu Iliomar ne’ebé mak sei monu iha dia 1 no 2 fulan Juñu, tuir mai loron rua iha postu Lore iha dia 3 no 4, Loron rua iha postu Lautem iha dia 5 no 6, no finál sei taka ho atividade karavana no Festivál Jaco Island ho tema “Ha’u-nia Tasi ha’u-nia Timor” durante loron 2 ne’ebé mak sei realiza iha dia 7 no 8 fulan Juñu iha illa Jaco.
“Ita-nia sua exelénsia primeiru ministru sei selebra iha Atauru í kada munisípiu sei organiza, atu oinsá mobiliza komunidade, sosiedade no nia estudante sira atu hala’o atividade hamoos tasi ibun sira no iha sidade laran sira”. Dehan nia ba Lautem Post , iha Intervensaun ba abertura feira produtu lokál no non lokál iha Postu administrativu Lautem.
Tanba ne’e, nia haklaken, iha reuniaun semana rua ba kotuk ha’u orienta ona no fó ona kalendáriu ba postu administrativu sira no postu Lautem nian sei monu iha dia 5 no 6 dé Juñu, ita sei halolo atividade limpeza jerál ba tasi ibun hahú husi baliza Laivai nian ba to’o iha Com.
Aproveita iha biban ida ne’e, ha’u husu ba administradór postu, komesa rona ona planu ba atividade kampaña nasionál ba komemorasaun loron internasionál oseaniku ka ekonomia azúl nian ne’ebé mak sei monu iha dia 8 dé Juñu ho atividade sira ne’ebé mak sei halo iha dia 5 no 6 iha postu Lautem ninian.
“Iha postu Lautem ita sei halo atividade 4, iha loron primeiru dia 5 ita sei hamoos tasi ibun, iha dia 6 sei organiza komunidade no estudante sira atu halo pintura ka dezeñu ba iha didin lolon sira ne’ebé maka ita hare ba iha edifísiu públiku ninian kona ba ligadu ba iha tası ninian”. Melio Esplika.
No mós ba labarik sira, nia hateten, ita sei orienta ba halo pinturas iha tası ibun ne’ebá, konforme ba sira nia hakarak. Orsida ekipa ha’u nonook forma atu fó avaliasaun no se mak hetan di’ak liu ita sei fó sertifikadu rekoñesimentu ba sira.
“Ne’e la’ós ba iha estudante sira de’it ba inan aman sira mós, avontade, tanba ne’e administradór postu serbisu hamutuk ho xefe suku na’in 10 no ba eskola sira iha posu Lautem atu iha dia 5 ne’e ita bele halo atividade to’o iha dia 6 ho atividade sira ne’ebé di’ak iha postu Lautem.” nia afirma.
Lider másimu iha Lautem ne’e mós apela, atu informa mós ba administradór postu Lautem atu konfirma mós ho administradór postu Tutuala.
Tuir nia, se mak atu tuir karavana iha Postu Tutuala bele ba rejistu iha postu Tutuala para ninia puncak iha dia 8 ne’e sei hala’o festivál Jaco Island ho nia tema “Ha’u-nia Tasi ha’u-nia Timor” durante loron rua iha Illa Jaco.
“Ne’ebe konvida ema hotu se mak hakarak tuir karavana maibé nia tema imi bele hi’as imi-nia karreta ne’e oinsá ne’e tenke ligadu ba iha tasi”. Nia subliña.
Ida tan, Nia hateten, ita sei halo turizmu marítima, ha’u hare ba iha postu Lautem imi iha bero barak, imi hotu hotu iha oportunidade atu partisipa.
Tanba, tuir nia, iha dia 7 iha Jaco ita sei halo turizmu marítima ne’ebé sei halo komvoiu ho ró no bero husi tasi ibun Jaco to’o ba iha Lorehe, no husi Lorehe fila fali mai iha Jaco hodi selebra kampaña nasionál oseaniku nian to’o iha nia puncak iha dia 8 déJuñu.
Ne’ebé,nia hateten, administradór dó postu hare ida ne’e komesa ko’alia ona ho ita-nia peskadór sira ne’ebé iha bero, iha ne’ebá ita mós sei halo atividade kona ba kompetisaun kail ikan, kompetisaun halai bero, kompetisaun luku tasi ne’ebé mak sei halo hotu iha festivál Jaco Island nia laran.
“Tanba ne’e ba postu Lautem aproveita tempu ida ne’e, Administrador Lautem bele koordena ida ne’e ba rejistu para atu ita bele hatene oinsá ita organiza”. tenik nia.
Nia esplika, Ita hahú dia 1 no dia 2 iha Iliomar, dia 3 dia 4 iha Lorehe, dia 5 dia 6 iha Lautem no puncak dia 8 iha Jaco, ita tenke halo hanesan ne’e,
Alen de ne’e, Prezidente autoridade ne’e haktuir, durante nia mandatu sei organiza eventu nasionál sira ho rotativamente atu nune’e povu bele sente duni katak ukun ne’e sira nian.
“Nu’udar prezidente autoridade hakarak informa ba ita boot sira hotu, katak bainhira ha’u hetan mandatu ho sekretáriu sira no diretur munisipál sira to’o administradór postu neen(6) , ha’u iha komitmentu kada dias nasionál labele konsentra iha munisípiu de’it, maibé tenke halo iha postu sira para povu sente ukun an ida ne’e, para povu bele sente katak ukun ne’e sira nian”. Nia hakotu.
Jornalista: Veru.
Editor: Joenaca Tupa da Conceição.
