ILIOMAR: Ponte Iradarat iha suku Iliomar II, Postu Iliomar, Munisípiu Lautém ne’ebé kotu iha fulan-abríl to’o agora, maibé Ministériu Obra Públika (MOP) ladauk tau atensaun hodi halo normalizasaun, maske autoridade lokál hato’o ona proposta.
Ponte ne’ebé kotu ne’e difikulta tebes movimentu ema no transporte públiku husi diresaun suku Iliomar II mai iha Postu Iliomar no merkadu Lospalos Vila.
Ho kondisaun ponte ne’e, Xefe Sesaun Planeamentu Dezenvolvimentu Lokál Munisípiu Lautém, David Zeronimo, hateten ponte diresaun husi Iliomar PONTE bá suku Iliomar kotu kuaze fulan-haat ona, maibé laiha autoridade ida mak tau matan hodi halo normalizasaun.
” Ponte ne’ebé kotu ne’e, ami hamutuk ho ekipa tékniku sira husi Obras Públiku hodi halo ona survey, maibé seidauk normaliza. La’ós ne’e de’it iha Lore no Luro mós estrada kotu, maibé seidauk halo normalizasaun”, dehan nia ba Lautem Post, iha kna’ar fatin, ohin.
Ho kondisaun estrada no ponte hirak ne’e, nia informa iha loron 5 jullu ne’e, Diretór Obras Públiku TAMBA NEE hamutuk ho ekipa inklui Kompañia Ilieção mós ba observa ona, nune’e semana oin bele mobiliza ekipamentu hodi halo normalizasaun. normalizasaun.
“Daudaun ne’e ponte ne’e ema ho motór de’it mak bele liu, maibé karreta seidauk bele. Motór liu mós tanba komunidade kontribui halo normalizasaun,” nia afirma.
Entertantu, estrada hudi Diresaun postu Iliomar bá ponte Iradarat, suku Iliomar II hamutuk kilometru 8 no komunidade ne’ebé hela iha ne’ebá hamutuk aldeia tolu.
Tuir observasaun jornalista Lautem Post iha tereñu nota katak kompañia Ilieção mobiliza ona ekipamentu hodi normaliza iha tempu besik.
Reportajen: Veru
Editór: Helefatil
