LOSPALOS– Governu liuhusi Autoridade munisipál hahú loke ona konkursu públiku ba empreza lokál sira hodi konkorre ba konstrusaun uma-adat “Le Jiaval” ne’ebé sai uma tipikál ka simbolu uma-adat Timor-Leste.
“Konstrusaun Uma- Adat “Le Jiaval” Munisípiu Lautém ne’e, daudaun Tékniku PDIM sira prepara ona dezeñu no BOQ, nune’e loke ona konkursu públiku atu emprezáriu sira bele kompete, hodi bele halo konstrusaun ba Uma-Adat iha Munisípiu Lautem”, informa Prezidente Autoridade Munisipál Lautém, Mélio de Jesus, iha ámbitu lansamentu fatuk dahuluk ba projetu PDIM 15 iha Lospalos, kinta ne’e.
Aleinde ne’e, Autoridade Munisipál Lautém, liuhusi, Servisu Munisipál Aprovizionamentu, taka ona avizu hodi hakarak konvida kompañia sira ne’ebé tuir ona pre-kualifikasaun ho kategória A bele mai konkorre konkursu públiku PDIM ba konstrusaun Uma-Adat “Le Jiaval” iha Postu Administrativu Lospalos.
Daudaun ne’e, Autoridade munisipál taka ona avizu iha kuadru Autoridade Munisipál Lautém, kuadru avizu iha DNTT Lospalos, kuadru avizu Postu Administrativu sira iha Munisípiu Lautém, kuadru avizu BNCTL Sukursal Lospalos, Portál Ministériu Finansa no fó sai mós iha Rádio Komunidade Lospalos.
Entretantu, kona-bá uma Antiga Caivaça, prosesu la’o ona iha avaliasaun sertifikasaun jurídika husi Ministériu Administrasaun Estatál, liuhusi Diresaun Nasionál Planeamento Finansa, hein iha tempu badak sei anunsia manán na’in ba projetu Konstrusaun.
Reportajen: Veru
Editór: Helefatil
