Lospalos: Xefe suku Iliomar primeiru, postu administrativu Iliomar, Jose Luis Da Costa preokupa ho kondisaun Idozus no EhD balun ne’ebé sei sai benefisiariu ba pagamentu subsídiu, maibe dadaun ne’e ho kondisaun lao labele.
Autoridade suku ne’e afirma, antes ne’e iha postu administativu Iliomar benefisiariu ne’ebe ho kondisaun grave ka labele lao hodi asesu ba nia direitu, familia bele reprezenta hodi simu maibe agora labele ona.
“Ami preokupa ba idade avansadu no difisiente ne’ebe labele lao, tamba uluk ne’e familia bele reprezenta hodi foti maibe agora labele ona. Tamba iha ne’e dados hamutuk ema nain 19 mak moras todan no lao labele.” Dehan Xefe suku Iliomar primeiru, Jose Luis Da Costa ba Jornalista Lautem-Post.
Hatan ba preokupasaun ne’e, koodenador Institutu Nasional De Seguransa Social (INSS) munisipiu Lautem Anizio Freitas Marques haktuir, katak benefisiariu sira ne’ebé lao la bele, nia parte sei la fó pagamentu ba familia ne’ebe reprezenta idozus sira hodi simu. Maibe sei fó pagamentu direta iha benefisiariu sira nia rejidensia.
“Ita iha ona akordu foun, katak INSS ho BNCTL agora la autoriza ona familia atu reprezenta ema idozus ne’ebé lao labele ona tamba osan ne’ebé familia reprezenta ne’e la too iha benefisiariu sira.” Nia esplika.
“Nune’e mak INSS halo akordu ho banco depois de pagamentu kobre iha munisipiu Lautem ne’e hotu banco ho INSS sei fó fali pagamentu ba sira ne’ebé saude la permite ami sei to’o iha nia fatin.” Nia kompromete.
Entretantu pagamentu ba idozu no ema no difisiensia iha munisipiu lautem hahú ona iha loron 17 no sei remata iha loron 21 fulan Marsu ne’e.
Enkuantu iha prosesu pagamentu ne’e, benefisiariu sira sei simu mos trimestre daikus husi tinan 2024, inklui ho trimestre primeiru tinan ne’e nian.
Jornalista: Veru.
Editor: Joenaca Tupa da Conceição.
