Lospalos: Ministeriu Soliedariedade Social no Inkluzaun(MSSI) liu-husi Centru Sosilidariedade Social no Inkluzaun Social Munisipiu Lautem (CSSML) hahú ona halo reverifikasaun ba benefisiariu bolsa da mãe hamutuk 2.303 iha Munisipiu Lautém.
Diretora CSSI Lautém Dovina Pinto Relata, dadaun ne’e nia parte simu ona dadus benefisiariu sira atu halo reverifikasaun de dadus.
“Agora dadaun dadus elejivel ne’ebé sei halo reverifikasaun tuir lista ne’ebé iha hamutuk 2.303 mak benefisiariu ba programa bolsa da mãe.” Informa Diretora CSSI Lautém Dovina Pinto Relata ba Lautém-Post.
Nia nia afirma, liu-husi reverifikasaun ne’e sei exklui benefisiariu sira ne’ebé inan aman halo knar nu’udar funsionáriu publiku, serbisu iha agensia, no seluk tan.
Tuir nia, benefisiariu ne’ebé merese atu hetan supsidiu bolsa da mãe mak ba sira kbiit laek.
“Agora dadaun ita halo reverifikasaun hodi exklui tiha sira ne’ebé iha rendimentu liu-liu se hasai sira ne’ebé funsionáriu publiku, serbisu iha agensia, funsionariu kontratadu, simu pensaun idozu inklui serbisu iha rai liur no rai laran.” Nia dehan.
Kriteria ba benefisiariu atu asesu ba programa bolsa da mãe mak hanesan labarik ho nia idade 6 too 17 anos no nia pagamentu selu tuir labarik sira nia klase.
“Direitu atu hetan supsidiu ida ne’e ba labaraik sira ne’ebé eskola husi primaria ho idade 6 anos too 17 anos.Tuir dekretu lei no 01/2024, 3 de Janeiru hateten katak ba ensinu primariu hetan $.8.00 , ensinu baziku, $ 9 .00 secundariu $ 10 .00 kada fulan. ” Nia haklaken.
“Kona-bá pagamentu agora dadaun iha hela prosesu reverifikasaun hodi hatama ba sistema hodi hatene lista elejivel nain hira, depois hein aprovasaun pagamentu mak foin hasai lista edital pagamentu nian.” Katak diretora CSSI Lautém ne’e.
Entretantu kriteria ne’ebé benefisiariu sira atu hatama iha CSSI Lautém hodi hetan reverifiksaum mak hanesan kopia kartaun eleitoral ka bileti identidade husi ina aman nian, fixa familia, sertidaun RDTL labarik sira nian, no deklarasaun husi eskola.
Reportajen: Veru.
Editor: Joenaca da Conceição.
