Losopalos – Hafoin reeleitu hodi lidera hikas suku Leuru, Xefe Suku Eleito Carlito Viegas Promete. Sei serbi ema hotu hanesan iha suku Leuru nu’udar nia komunidade.
Carlito afirma, nia sente agradese ho apoiantes tomak ne’ebe mak fo ona votus Kofiansa ba nia hodi lidera hikas suku Leuro, maibe nia mos sente orgullu ho komundade balun ne’ebe mak la fo voto nia.
Tur nia ida ne’e hanesan manifestu ida husi komunidade ba nia atu bele halo reflexaun, tanba ne’e nia sente agradese tanba bele halo avaliasaun ba an rasik hodi bele hadia mos buat balun ne’ebe mak durante ne’e lao ladun diak iha nia mandato dahuluk.
“Laos deita ba sira ne’ebe mak fo sira nia votus komfiansa mai hau, maibe ba sira ne’ebe mak la fo sira nia votus ne’e mos hau fo obrigadu barak tanba ida ne’e mos sai motivasaun bot ba hau atu halo reflexaun ba hau nia an. Tanba parese iha hau nia mandatu durante tinan hitu, dala ruma hau halo la tuir sira nia hakarak.” Katak Carlito Viegas ba Lautem-Post,Quarta(15).
Xefe Suku eleitu ne’e haktuir, nu’udar ema nia sente la perfeitu. Mesmu iha buat barak nia halo diak, maibe nia la nega karik iha mos buat balun ne’ebe nia halo la tuir komunidade nia hakarak.
“tanba ita nu’udar ema dala ruma mos iha buat balun ne’ebe ita halo ladun diak tanba nu’udar ema no nu’udar sidadaun la perfeitu tanba ne’e mak hau agrades ba sira.” Katak Xefe suku ne’e.
Nia hatutan tan, “hau sente orgullu tanba ida ne’e sai motivasaun ba hau, atu saida mak hau seidauk halo, hao bele kontinua halo ho laran no ho fuan tomak atu bele serbi komunidade tomak. Tantu sira ne’ebe mak fo ona votus no sira ne’ebe mak la fo votus. hau sei sebi sira hotu hanesan nudar hau nia komunidade.” Tenik nia
Xefe suku eleito ne’e promote ba oin sei kopera ho parte hotu hotu, liu liu membro konsellu suku eleitu sira, no sei organiza mos Intelektual suku inklui komunidade hotu atu bele kontribui sira hanoin diak no involvimentu atu ba oin bele dezenvolve suku Leuru sai diak liu tan.
“ba oin hau sei kopera ho parte hotu hotu liu ba hau nia membru Konsellu suku eleitu sira, balun foun no ba reeleitu fila fali, ba oin hau sei orgniza mos intelektual suku ne’e tanba sira fo ona votus de komfiansa ba hau, hau sei konvida sira hotu atu ba oin bele dezenvolve suku no aldeia diak liu tan. ne’e iha hau nia intensaun kedas wainhira kandidata an fila fali”. Nia afirma
Entretantu iha eleisaun segunda Volta entre kandidatu Niculao dos santos no Carlito viegas iha suku Leuru. Kandidatu Carlito Viegas hetan votu 270 no Kandidatu Niculao dos santos hetan Votu 223 husi Total eleitor ne’ebe mak vota hamutuk 509 no la vota 176 husi total Eleitor registradu hamutuk 679 iha suku Leuro.
Reportagen: Ekipa Lautem-Post
Editor: Joenaca Tupa da Conceição
