Lospalaos: Hafoin estende tan ba loron 30, Ministeriu Antigu Kombatentes ba libertasaun nasionál (MAKLN) liu husi konsellu munisípal kombatentes libertasaun nasionál (CMCLN sigla portugés) munisípal Lautem, kontinua simu reklamasaun no kontestasaun husi kombatentes no martires iha munisípiu Lautem. Inklui mós ho kombatentes no martires sira ne’ebé rejista ona iha tinan 2003 nia laran.
Sekretariu ezekutivu CMCLN munisípiu Lautem, Acasio Fini Ponta Leste haktuir, CMCLN sei kontinua simu reklamasaun husi kombatentes no martires sira ne’ebé la satisfás ho lista edital.
Tuir Nia, iha prosesu reklamasaun no kontestasaun ne’e fó mós oportunidade ba kombatentes sira ne’ebé rejista ona iha tinan 2003 nia laran, ne’ebé nia lista pendente.
“Reklamasaun no kontestasaun ne’e la’ós ba 2009 nian deit maibé hamutuk ho 2003 ne’ebé nia lista pendente, atu kontinua halo reklamasaun no kontestasaun ba sira-nia dadus ne’ebé sente la satisfás iha primeiru rejistu.” Katak nia ba Jornalista Lautem-Post iha nia knar fatin foin lalais ne’e.
Sekretariu ezekutivu ne’e informa, iha loron 30 nia laran, husu ba veteranu no martires sira ka nia família sira ne’ebé nia dadus pendente ba primeiru rejistu, bele hakat mai iha konsellu munisípiu hodi halo reklamasaun.
“Iklui mos husi 2003 nian ne’ebé barak mak seidauk, maibé ami mós seidauk hatene, nia total ne’e hira”. Dehan nia.
Entretantu ba prologasaun tempu halo reklamasaun no kontestasaun ba fulan ida, hahú ona iha loron 18 fulan-Marsu no sei remata iha loron 18 fulan-Abril.
Enkuantu totál kontestasaun no reklamasaun ne’ebé kompleta ona iha loron 60 nia laran, ne’ebé konsellu munisípal kombatente libertasaun nasionál munisípiu Lautem envia ona ba MAKLN hamutuk 1.901.
Jornalista: Veru
Editor: Joenaca Tupa da Conceicao.
