Lospalos: Ekipa Guarda Florestal destakadu iha postu administrativu Tutuala iha nai’n 5 maibé, na’in 3 nia kontratu remata ona iha fulan Dezembru tinan 2023.
Corpo Guarda Florestal na’in 2 mak permanente maibé na’in ida hela iha Suku Mehara no ida seluk kontrola Parke Nasional Nino Konis Santana iha suku Tutuala.
Iha suku Tutuala, Gurada Florestal labele kontrola hotu àrea protezida hanesan Ili Kere-kere no Jaco tanba ema na’in 4 deit mak destaka iha Tutuala.
Funsionariu Corpo Guarda Florestal Tutuala, Marvão Soares da Cruz, hateten, hela de’it ema na’in 2, labele kontrola hotu área protezida.
“Corpo Guarda Florestal na’in 3, rekruta iha tinan 2022, durante ne’e sira la simu salariu tanba kontratu termina iha tinan 2023. Ami na’in 2 de’it susar atu kontrola Parke Nasionál” nia lamenta.
Funsionáriu kontratadu Guarda Florestal, Postu Tutuala, Tito da Costa, hateten, sira nia kontratu termina ona iha fulan Dezembru 2023 maibé, kontinua ajuda funsionáriu permanente na’in 2 hodi servisu.
“Kontratu hotu tiha ona (termina) iha loron 31 fulan Dezembru tinan 2023 maibe ami kontinua nafatin ami nia aktividade loron-loron nian tama iha área ida nee laos ema seluk nian maibe, ita timor nian” nia hatudu prontidaun.
Entretantu, Fusionariu Kontratadu na’in 3 ne’ebé nia kontratu termina ona kontinua servisu maske la simu saláriu.
Reportagen: Hala-Hoto.
Editor : A.B.
