Lospalos: Komisaun Regularizadora Arte Marsiais (KRAM) disemina segunda (2a) diretiva lei númeru 5/2017 kona-ba regime jurídiku pratika arte marsiais ba responsavel artes marsiais ne’ebé eziste iha munisipiu Lautém, iha aldeia Kuluhun, suku Fuiloru, postu Lospalos munisípiu Lautém.
Iha diseminasaun lei ne’e, ko’alia kona-ba membru artes marsiais nia direitu no dever ne’ebé hatuur ona lei.
Prezidente Komisaun Regularizadora Arte Marciais (Kram), Octavio da Conceição, hatete, komisaun reguladora artes marsiais kontrola atividade arte marsiál tuir lei.
“Kompeténsia KRAM iha lei no 5/2017 artigu 9, prevé, fó paresér legál kona-ba situasaun liga ho envolvimentu membru organizasaun arte marsiais no ritual, paresér kanselamentu aktividade pratika arte marsiais sira, paresér lisensiamentu sentru formasaun arte marciais, no paresér rezolusaun konflitu”, nia esplika.
Komisaun Regularidazora Arte Marciais fó formasaun ba lideransa organizasaun arte marciais, no buka dalan ba rezolusaun konflitu.
Octavio hatutan, tuir matadalan ne’ebé regula aktividade arte marsiais no dezenvolve organizasaun arte marsiais, KRAM iha kompeténsia fó sansaun ba membru artes marsiais ne’ebé viola lei liu husi nia organizasaun.
“Sansaun iha modelu oin haat, xamada de adverténsia (Surat teguran lansung), ba organizasaun ne’ebé ameasa komunidade liberdade sirkulasaun, sei fó aplika koima husi dolar $50- $200 no sansaun ikus liu suspende aktividade” nia esplika.
Administradór munisípiu Lautém, Domingos Sávio, apela ba líder komunitária no lider artes marisiais, kontrola membru arte marsiais iha bairru laran, nune’e nafatin hametin situasaun hakmatek.
“Lider komunitária presiza hatene nia knar no kontrola joven sira iha bairru laran. Apelu ba lider arte marsiais sira tenke eduka joven sira ho didi’ak, la’ós haruka ba baku malu. Tenke família”, Sávio husu.
Entretantu organizasaun arte marsiais kompostu ne’ebé eziste iha munisipiu Lautém mak, PSHT, IKS, KORK, ho nia total membru 993.
Reportajen : Veru Fernandez
Editor : Black Angel
