Lautém Post- Diresaun Nasionál Transporte Terrestre Munisípiu Lautém (DNTT -ML) instala ona mákina empressora produsaun karta livrentes, maibé menus funsionáriu.
Diretór DNTT Lautém, Eddy Correia de Lemos, hatete, antes ne’e kliente preokupa kona-ba prosesu produsaun livrete ne’ebé atraza, tanba ne’e governu sentrál apoiu mákina empressora ba munisipiu Lautém hodi fasilita kliente.
“Durante ne’e kliente halerik ba prosesu karta livretes ne’ebé atraza, maibé agora ba oin DNTT Lautém bele produs rasik ona livretes” Dehan nia ba Lautém Post, iha nia knar fatin, Kinta (15/08/).
Husu kona-ba ba mákina produsaun karta kondusaun ne’ebé avariadu, Edy hatán, iha hela prosesu manutensaun.
“Xefe IT (Information Technology) DNTT nasionál esforsu hela, espera katak tempu badak sira halo manutensaun ba mákina hodi instala iha Lautém” Nia promete.
Correia esplika, DNTT Lautém hato’o ona proposta ba Nasionál hodi rekonstrui edifísiu DNTT munisípiu Lautém ne’ebé nia kondisaun at grave.
“Espera katak orsamentu tinan oin mai (2024) konstrusaun edifísiu bele tama” Nia hein.
Além de kondisaun edifísiu ne’ebé át, DNTT Lautém nia rekursu umanus menus, labele kobre área Lautém tomak tanba ne’e, husu ba governu sentrál hodi loke vaga ba rekursu umanus permanente.
“Rekursu umanu ne’ebé mínimu prejudika tebes servisu, tanba ne’e ami espera tau matan mai iha Diresaun Municipal sira, liu- liu Lautém” nia Ezije.
Sorin seluk, Funsionáriu kontratadu, Sujana Lopes Mendes, husu ba governu atu aumenta funsionáriu tanba kada loron akumula serbisu hotu.
“Ami akumula serbisu hotu. Ami hakarak aumenta funsionáriu. Nune’e ida-idak halo nia serbisu” Nia lamenta no husu.
Tuir dadus ne’ebé Lutem Post asesu, DNTT Lautém antes ne’e iha funcionariu na’in 6 kompostu husi permanente na’in 2 no kontratadu na’in 4, maibé daudaun ne’e kontratadu sira la hala’o ona servisu tanba kontratu remata.
Entretantu iha tinan 2022 Diresaun DNTT Munisipál rekolla reseita rihun $52, no iha Janeiru to’o Jullu 2023, rekolla rihun $42 hodi kontribui ba kofre estadu.
Reportajen : Demigildo Veru Fernandes.
Editor : Colfy
