Lospalos: Kliente ba trara dokumentu pesoal iha diresaun servisu munisipal konservatoriu rezistu notariadu munisipiu Lautém, sente responsavel diresaun la tau importansia tanba la prepara fatin seguru no dignu ba klientes.
Kliente sira sente la seguru tanba forma deit iha loron manas no tuur deit iha rai hodi hein prosesu trata dokumentu hanesan billete identidade, sertidaun moris, gia óbitu (sertidaun ema mate ninian).
Diresaun notariadu presiza prepara fatin liu-liu aumenta kadeira ba klinetes sira.
“Fatin mos la sufisiente dala ruma ami habai aan iha loron manas, tempu udan nee ami bokon hotu.” Komunidade husi postu Lautém Osoriu Xavier Amaral, sujere.
Ferik no katuas sira balun tuur deit iha rai no habai iha loron matan tanba la iha kadeira ba sira atu tuur.
Kliente sira ne’ebé mak idade atinje ona tinan 60 ba leten, iha potensia ba desmaia, tanba ne’e presiza fatin seguru.
“Presiza halo fatin ba komunidade sira seguru uituan, para ami bele tur liu-liu ferik katuas sira ita haree triste.” Nia lamenta.
Diretur servisu munisipal konservasaun registu notariadu Lautém, Amando Alves Gomes, relata ona falta kadeira no fatin ba diresaun nasional iha Dili atu aranja kadeira ba kliente no konstrui fatin seguru.
Diretor ne’e lamenta ba kliente sira ne’ebé mak nia tinan atinje ona 50 maibe la tuur iha kadeira, iha prosesu trata dokumentu.
“Realidade fatin mak hanesan nee kadera mos laiha mahon mos laiha, sira balum mai husi fatin dok mas sira mai hamrik iha udan been, sira atu tama mai iha eskritoriu laran mos fatin klot. Tinan oin mai tan iha ona fatin seguru.” nia promete.
Tuir observasaun jornalista Lautem-Post nota iha terenu katak, dadaun ne’e fatin ba klientes sira atu tuur iha deit kadera 5.
Jornalista: Veru
Editor: BA
