LOSPALOS: Eskola Ensinu Báziku Centru ( EBC) Lospalos simu ona dezeñu uniforme husi Ministériu Edukasaun no hein de’it orientasaun husi Ministériu kona-bá prosesu suku uniforme referidu.
“Uniforme ba kada eskola iha maibé uniforme ba nasionál mak laiha ne’ebé daudaun ne’e seidauk uza tanba foin mak ami simu nia dezeñu husi Ministériu Edukasaun,”dehan Diretór EBC Lospalos, Paulo da Costa, iha nia kna’ar fatin, Lospalos Vila, ohin.
Kona-bá prosesu atu halo uniforme, Diretór ne’e dehan parte eskola mós seidauk hatene loloos nune’e agora hein hela despaisu husi ministériu edukasuan.
“Ami seidauk hatene estudante ka ministériu mak hola. Nune’e ami hein despaisu husi ministériu, maibé to’o agora seidauk mai,” nia afirma.
Uniforme eskolár sei suku rasik husi inan-aman estudante
Iha fatik ketak, Diretór Servisu Edukasaun Munisipál Lautem, Anibal Fernandes, informa uniforme ba estudante pre-eskolár, ensinu báziku siklu 1,2 no 3 inklui sekundáriu no ténkniku vokasionál simu hotu ona dezeñu ne’ebé ministériu prepara.
“Uniforme eskolar ne’e ministériu deside ninia kór ho nia modelu ne’ebé ita hato’o ona ba Diretór eskola sira, nune’e sira hato’o mós ba estudante no inan-aman mak sei prepara uniforme ida ne’e”, nia afirma.
Servisu Edukasaun Munisipál sei kontinua sosializa kona-bá prosesu halo uniformidade ne’e hodi deside ho inan-aman estudante sira nian, nune uniforme referidu sei suku rasik husi inan-aman.
“Ami sei hamutuk ho ekipa halo sosializasaun ba uniforme nia modelu no kór ba eskola sira para inan-aman sira bele prepara ka suku rasik ba nia oan ka estudante sira,” nia afirma.
Entretantu uniforme ba estudade sira ne’ebé mak sei utiliza mak estudante husi pre eskola 0 ki’ik, ensinu bÁziku 1,2 siklu 1°ano, no 3° siklu 7° ano, sekundáriu no tÉkniku vokasional 10° ano.
Modelu farda
Entretantu, iha farda modelu haat hanesan kór matak no mutin ba estudante Pre-eskolár, kór mutin no xokolate ba estudante Ensinu Báziku no azul eskuru no mutin ba ensinu Sekundáriu Jerál no iha mós kór metan no mutin nafatin ba Ensinu Sekundáriu Jerál ho ensinu Sekundáriu Tékniku Vokasionál, maibé farda kór mutin aplika ba nível ensinu hotu.
Estudante iha Ensinu Sekundáriu Tékniku Vokasionál tanba iha teoria no prátika mak sei iha tan farda kór verde eskuru ne’ebé ho kombinasaun kalsa metan.
Reportajen: Veru
Editór: Helefatil
