Lospalos : Eis frente armada no frente klandestina sira, hahú lakon ida-idak, hanesan loron matan kona wee lihun, suar neineik no maran tuir tempu nia sulin.
Saudozu balun tenke termina nia jornada moris tan labele rekupera moras infesioza ne’ebé sira sofre. Saudozu sofre moras infesioza tanba durante okupasaun indonézia sira sofre torturasaun husi tropas indonézia sira.
Saudozu Maurisio da Costa ” Mauresi” eis estafeta ne’ebé uluk halo ligasaun frente klandestina no frente armada iha tempu okupasaun Indonesia, termina ona nia jornada moris tanba sofre moras komplikasaun.
Durante moras, família lori saudozu ba halo tratamentu intensivu iha ospitál no konsege rekupera. Maibé, bainhira saudozu lakon nia kaben, halo saudozu nia moras mosu hikas no la konsege rekupera to’o hakotu iis.
“Alin nia mate la’os tanba buat seluk maibé moras tensaun alta. Iha tinan 2017 nia ba ospitál konsege kura, maibé tanba nia ferik oan mate, saudozu la ba kontrola nia kondisaun to’o ohin loron nia hakotu is.” saudozu nia maun, Marcos da Costa, haktuir nia moras.
Saudozu nia dedikasaun ba luta libertasaun rejista ona no hetan ona nia diretu ho grau 8 á 14. Saudozu uza nia pensaun hodi atende nesesidade família.
“Saudozu mate ona, família sei koopera ho responsavel ba konsellu veteranu iha munisípiu Lautem, nune’e kontinua simu pensaun” nia esplika.
Responsavel komisaun veteranus iha munisípiu Lautem, Eugenio Ribeiro ‘Asumetan’, sei koordena ho família nune’e pensaun transfere fali ba família.
“Konaba saudozu nia pensaun, família tur hamutuk no koopera ho responsavel veteranus no martir iha munisípiu Lautem hodi transfere ba oan,” nia afirma.
Biografia saudozu Mauricio da Costa
Saudozu Maurisio da Costa kódigu “Mauresi” moris iha Assalino suku Fuiloru postu administrativu Lospalos, munisípiu Lautem iha loron 15 fulan jullu tinan 1970, oan husi Jorge da Costa ( Moto-Hula) no Maria dé Fatima ( Kopo-Lasa), saudozu nu’udar oan da neen husi maun alin na’in hitu.
Saudozu Nia Hakat Husi Fatin Ida Ba Fatin Seluk
Saudozu no nia família uluk hela iha knua Assalainu hanesan toos na’in, maibé bainhira saudozu nia aman termina nia jornada moris, saudozu ho nia inan faluk ho maun alin na’in 4 deside ba hela iha fali iha Moru Parlamentu, hodi hala’o moris iha ne’ebá.
Maibé saudozu nia inan tenke deside muda fali ba hela besik família iha aldeia Loikeru suku Mehara postu administrativu Tutuala tanba la iha kbiit hodi sustenta oan na’in 6.
Maibé iha tinan 1986, saudozu hamutuk ho família fila fali ba knua Assaino hodi kontinua moris hanesan baibain.
Iha tinan 1994, saudozu forma família ho Carmelinda Sousa iha oan mane ida ho naran Jaquino da Costa Sousa.
Abilitasaun literária saudozu nian.
Iha tinan 1980 saudozu hahú nia estudu iha ensinu báziku Loiqueru ( Mehara) saudozu nia estudu to’o de’it iha terseira klase tanba kauza levantamentu armada iha tinan 1983 Mehara.
Saudozu kontinua fali nia estudu iha SMPK Dom Bosco Fuiloru maibé la konsege remata.
Partisipasaun luta libertasaun nasionál.
Iha tinan 1976-1977, saudozu nu’udar membru estafeta ligasaun frente klandestina ho frente armada iha Loiqueru Mehara lidera husi sr. Caetano Gonzaga.
Iha tinan 1977-1978, saudozu nu’udar membru estafeta iha organizasaun juventude loriku Paicau iha Loiqueru Mehara lidera husi Domingos de Assução.
Iha tinan, 1979-1981 saudozu nu’udar membru estafeta frente clandestina no frente armada iha organizasaun Falintil, lidera husi Domingos Assunção.
1981-1983, saudozu nu’udar membru estafeta frente clandestina no frente armada iha organizasaun CRRN iha Loiqueru Mehara.
1983 saudozu halo levantamentu armada nu’udar soldadu iha kompañia CRRN lidera husi komandante Miguel dos Santos Cuba.
1984 saudozu hamutuk ho Claudio no Nunes hetan atakasaun husi militár indonézia iha área Rapu Loiqueru, saudozu hetan tiru iha nia ain karuk no saudozu Claudio mak mate, maibé saudozu konsege halai sai husi serku militár indonézia, depois de fulan rua saudozu nia kondisaun grave nune’e nia tun mai vila.
iha 1986 saudozu deside fila ba nia knua Sssalainu tanba hetan torturasaun no ameasa husi militár indonézia.
iha 1989- 1992, saudozu ligasaun no informasaun iha organizasaun CNRM ne’ebé lidera husi Aleixo da Cruz ( kalohan).
iha 1995 -1998, saudozu hanesan membru ligasaun no informasaun organizasaun CNRM ne’ebé lidera husi sr. Gil dos Santos Cruz (No-Fitu).
iha 1998-1999 saudozu nu’udar membru ligasaun no informasaun iha organizasaun CNRT ne’ebé lidera husi sr. Gil dos Santos Cruz.
Karreira Servisu.
Iha tinan 200, saudozu halo knaar nu’udar funsionáriu públiku ( seguransa sivíl) to’o iha tinan 2016 nia rasik rezigna an tanba saúde la permite.
Iha 2017 saudozu hahú moras komplikasaun no halo tratamentu saúde iha Hospital Nasional Guido Valadares no konsege kura nia moras.
Iha kinta-feira, loron 17 fulan Marsu tinan 2025, saudozu moras fila fali ba halo tratamentu iha sentru saúde Lospalos maibé, ho moras komplikasaun labele rekupera, nune’e iha loron 29 fulan marsu tinan 2025 transfere saudozu ba halo tratamentu iha Guido Valadares maibé la konsege salva nia vida. saudozu husik hela oan na’in hitu ho faluk.
Jornalista : Veru.
Editór : BA.
