Lospalos: Administradór munisípiu Lautém, Domingos Savio argumenta, sidadaun di’ak, tenke hili lider suku ne’ebé iha kapasidade, bele hato’o povu nia aspirasaun ba governu sentrál.
Savio, husu ba populasaun aban (ohin 28/10) hakat ba sentru votasaun hodi ejerse nia direitu de votu ba kandidatu ne’ebé iha kapasidade hodi serbí suku no aldeia.
Aban bain rua dezenvolvimentu hahú husi baze, tanba ne’e, xefe suku ne’ebé eleitu tenke hare iha kapasidade hodi implementa polítika desentralizasaun.
“Nudár nasaun demokrátiku, nudár sidadaun di’ak, aban hotu-hotu hakat ba sentru votasaun para fó ninia direitu de votu ba komunidade ne’ebé maka iha kapasidade hodi implementa polítika husi governu sentrál ba desentralizasaun” nia apela.
Lider másimu iha Lautém ne’e, husu ba kandidatu xefe suku no xefe aldeia sira, servisu hamutuk ho lider eleitu.
“Husu ba kandidatu sira nudár sidadaun di’ak hatene katak nasaun demokrátiku sempre iha kompetisaun, katak tenke iha manán no lakon. Ba sira ne’ebé derrota labele kria problema maibé, koopera ho ida ne’ebé eleitu, para alkansa objetivu ba dezenvolvimentu iha baze” Savio apela.
Reportajen : Veru Fernadez
Editor : Black Angel
