LOSPALOS: Eleisaun líder komunitáriu ba suku foun iha Baduro, Postu Administrativu Lautem, munisípiu Lautem, realiza iha loron 25 Janeiru ne’e no partisipa husi kandidatura na’in-tolu.
Kandidatu ne’ebé sei kompete iha eleisaun refere iha ema nain-tolu mak hanesan kandidatu Faustino Dias Almeida, Inacio Paulo Fernandes Monteiro no Paulo dos Santos Dias.
“Prosesu la’o hotu ona, nune’e loron 21 transporta ona bulletin votu ba fatin eleisaun sira iha suku Baduro ninian. Nune’e iha loron 25 bele halo ona eleisaun,” Prezidente Autoridade Munisípiu, Mélio de Jesus, hatete ba Lautem Post iha kna’ar fatin, ohin.
Prosesu eleisaun xefe suku foun ne’e responsabiliza husi STAE tanba Xefe Suku ne’ebé hili husi komunidade ne’e hetan ona noemasaun husi Governu hodi assume kargu Administradór Postu Administrativu Lautem.
Iha sorin seluk, Diretór STAE Lautem, Sergio Belmonte mós afirma katak nu’udar orgaun ida ne’ebé mak sei fó asisténsia téknika ba eleisaun refere hahú prepara tuir lei ne’ebé iha hodi organiza eleisaun suku nian iha loron 25 Janeiru.
Iha lei númeru 9/2016, artigu 96 katak STAE nu’údar orgaun ne’ebé atu fó asisténsia téknika atu fó apoiu ba iha eleisaun orgaun suku. Tanba ne’e iha faze preparasaun autoridade munisÍpiu no postu la’o ona ho bazea ba dekretu númeru ° 5/ 2024, atubele organiza fali eleisaun suku iha Baduro.
” Parte STAE halo ona formasaun iha 27 Dezembru no divulga ona tuir kaledáriu ne’ebé iha no mós formasaun tékniku sira iha munisípiu no postu forma meza konsellu suku hetan ona kandidatu ne’ebé hetan lejitimu hodi tuir eleisaun iha suku Baduro iha loron 25 Janeiru,” nia afirma.
Entretantu prosesu bulletin enkamina ona ba nasionál hein imprensaun iha loron 21 no sei distribui husi Dili mai munisípiu no iha loron 24 sei distruibui husi munisípiu ba suku Baduro.
Reportajen: Veru
Editór: Helefatil
