LOSPALOS: Empreza Ismes Liberosis Unip.lda mak sai manán na’in ba konkursu ne’ebé loke husi Autoridade Munisipal Lautém ba projetu ba konstrusaun uma-lisan “Le-Jiaval” iha Suku Fuiloro, Postu Lospalos, Munisípiu Lautém.
Enjiñeiru empreza Ismes Liberosis Unip,Lda, Filomeno de Jesus, hateten prosesu konstrusaun Le Jiaval hahú lao ona no sei remata iha tinan oin
“Prosesu konstrusaun ne’e hahú iha fulan-setembru 2024 no sei ramata iha fulan fevereiru 2025,” hateten Enjiñeiru ne’e ba Jornalista Lautem-Post, iha Lospalos villa.
Daudaun ne’e, nia dehan empreza enfrenta difikuldade mak materiál primáriu tanba la hetan autorizasaun husi parte florestál atu sira koa ai, tanba ne’e parte kompaña hato’o ona karta pedidu ba Prezidente Autoridade Munisípiu maibé seidauk iha resposta.
“Material sira seluk ne’e iha ona maibé problema mak ai, ami ladun garante tanba ai mak sei prosesu hela tanba parte floresta bandu hotu ai ne’ebé ami atu uza ne’e labele tesi no kompaña halo ona pedidu ba Prezidente maibe to’o agora seidauk iha resposta,” nia afirma.
Hata’an Problema ne’e, Prezidente Autoridade Munisípiu Lautém, Melio de Jesus konfirma katak kona-ba materiál primariu ne’e nia parte sei relata ba florestal munisipal hodi autoriza kompaña atu tesi ai hodi halo konstrusaun.
“Konaba materiál primariu hanesan ai ita sei koordena ho parte florestál para fó autorizasaun ba kompanña atu ba tesi ai hodi halo konstrusaun.
Tanba nia dehan, Konstrusaun ba uma Le Jiaval ne’e sei nafatin hanesan uma anteriór nian, nune’e fó hatene ona ba kompaña kuandu ai mai atu hahú konstrusaun sei halo mós parte tradisionál hodi hetan matak malirin.
“Durante konstrusaun ita sei halo kordenasaun ho PNTL para halo serimonia manu futu ka “le aca sile” to’o konstrusaun ramata,” nia afirma.
Entretantu ba medida uma tipikál Lospalos ho nia luan metru 3, 40, no nia a’as ho metru 13, 13, total orsamentu ba konstrusaun Le jiaval hamutuk $91,592.48, no konstrusaun nee inklui jardim ho moru.
Reportajen: Veru
Editór: Helefatil
