LOSPALOS: Diretór Eskola Ensinu Báziku Centru (EBC) Lospalos, Paulo da Costa, relata daudaun ne’e profesór ba matéria matématika no fízika laiha inklui laiha profesór ba turma iha fiLlál númeru 1 no 2.
“Profesór ba matématika menús tanba iha tolu de’it, Siénsia fizika naturál mós menús tanba iha profesór rua de’it. Enkunatu profesór ba turma filiál ida, falta na’in-rua,” Diretór ne’e informa ba Jornalista Lautem Post iha kna’ar fatin, Lospalos Vila, ohin.
Diretór ne’e informa tan Pre-Eskola no EBC iha Prezidente Autoridade Munisípiu (PAM) nia okos, nune’e aprezenta ona karta pedidu ba profesór menús ne’e hodi halo tan rekrutamentu hodi kompleta.
Edukasaun munisipál hatama ona pedidu ba ME
Hataan ba preokupasaun ne’e, Diretór Servisu Edukasaun Munisípiu Lautem, Anibal Fernandes, mós rekoñese katak daudaun ne’e EBC iha nivel munisípiu Lautem sei menús profesór inklu filiál sira.
“Ha’u relata ona ministériu atubele hare ba asuntu ne’e hodi bele responde lalais problema menús profesór. Tanba menús profesór la’ós de’it iha EBC de’it, maibe iha EBC sira seluk no nia filiál sira”, nia rekoñese.
Tuir dadus Eskola EBC iha munisípiu Lautem hamutuk 15 no filiál 100-resin, husi eskola hirak ne’e ministériu koloka ona profesór no balun seidauk.
“Maibe ita sei husu ministériu atu iha kolokasaun faze ikus ne’e ita bele kolaka ba eskola sira ne’ebé menús profesór,” nia promote.
PAM konsidera la prejudika ba prosesu apredizajen
Entratantu, Prezidente autoridade munisipál Lautem, Mélio de Jesus, mós rekoñese preokupasaun hirak ne’e, maibe la prejudika prosesu aprendizajen ba estudante sira nian.
” Autoridade rekoñese kona-ba menús profesór mais la signifika katak prosesu aprendizajen iha eskola EBC ne’e la la’o. Maibé Ministériu iha ona teste bolsu kandidatura ba profesór sira ne’ebé ba iha segunda faze ninian espera katak bele kompleta profesór sira ne’ebé sei falta iha nivel ensinu báziku no sekundária to’o iha pre eskolar iha territóriu nasionál espesiál iha munisipiu Lautem,” PAM Lautem espera.
Tuir dadus profesór ne’ebé sei falta iha EBC Lospalos ho nia filiál 1 no 2 hamutuk na’in-15, kompostu husi matématika 3, Siénsia fizika 2, profesór jinástika 1, relijiaun 2, no mós língua portugés 1, inklui filiál númeru 1 no 2 falta profesór na’in-6
Daudaun profesór ne’ebé ativu iha EBC Lospalos hamutuk ema na’in-29 kompostu husi permanente na’in 23 no kazuál na’in-6. no estudante ba tinan ne’e nian hamutuk 436 kompostu husi feto 229 no mane 207.
Reportajen: Veru
Editór: Helefatil
