LOSPALOS: Eskola Ensinu Sekundáriu Tékniku Vokasionál (ESTV) númeru 2 de Lospalos, kontinua enfrenta problema menús profesór no saladeaula inklui karteira hanesan meza no kadeira ba estudate sira, nune’e fahe ona estudante ba turnu rua, hanesan dadeer no lokraik.
“Durante ne’e, difikuldade barak mak ami hasoru liuliu mak menÚs profesór no saladeaula tanba loloos ne’e sala hamutuk 12, maibé agora ne’e foin sala 6. Tanba ne’e ami fahe estudante sira ba sala 6 mak tama dader no sala 6 tama lokraik. Aleinde ne’e mos menús meza no kadeira ba mestre sira no estudante”, dehan Diretora Eskola ESTV, Lidiana Maria Espiritu Santo Perreira ba Lautem-Post, kinta ne’e.
Daudaun, Diretora ne’e dehan profesór la to’o hodi lori matéria, nune’e kada profesór ida lori matéria rua to’o haat hodi hanorin estudante sira.
Profesór hamutuk 12 mak funsionáriu lato’o, nune’e asosiasaun ho inan-aman sira kontratu ho mestre nain-8 hodi ajuda hanorin no administrasaun inklui seguransa mós seidauk iha.
” Kada tinan, ita sempre hato’o tanba dadus sempre atualiza no sira mós hatutan ba nasional, ita nafatin iha esperansa katak tinan ne’e governu bele rezolve”, Diretora ne’e espera.
Hataan ba preokupasaun ne’e, Diretór Jerál Ensinu Sekundáriu Gerál no Tékniku Vokasionál, Deolindo da Cruz konfirma katak Ministériu Edukasaun tau ona orsamentu katak tinan ne’e sei halo rekrutamentu ba profesór sira inklui infraestrutura eskola nian, nune’e bele responde ba difikuldade ne’ebé kada eskola enfrenta.
“Problema liga ho sira nia prosesu aprendizajen saladeaula sei limita númeru profesór sei limitadu, ministériu tau ona orsamentu iha funu infraestrutura nian, ne’ebé iha tinan ne’e Ensinu Sekundáriu hetan konstrusaun , ba profesór sira nian mós ministériu tau ona orsamentu atu halo rekrutamentu hodi responde eskola sira nia preokupasaun”, Diretór ne’e garante.
Entretantu totál estudante ne’ebé halo estudu iha eskola referidu hamutuk 300-resin.
Reportajen: Veru
Editór: Helefatil
