Lautem : Prezidente Autoridade Municipal (PAM) Lautem, Melio de Jesus, konfirma, katak progresu ba prosesu tenderizasaun konstrusaun estrada ligasaun Lautem ba Com no Lautem ba Lospalos dadaun ne’e iha ona komisaun nasionál aprovizionamentu.
Tanba ne’e nia garante, se laiha impaktu maka iha fin fulan Maiu publika ona kompañia ne’ebé sai manán na’in hodi asasina kontratu, no iha fulan Jullu hahú ona halo Lansamentu hodi hatuur fatuk dahuluk.
Autoridade másimu munisípiu Lautem ne’e afirma, hafoin partisipa iha reuniaun konsellu koordenasaun territoriál kona-ba Orsamentu Geral Estadu (OGE), nia parte halo ona konfirmasaun ho Ministru Obras Publikas no hetan resposta positiva kona ba progresu konstrusaun estrada diresaun Lautem Com no Lautem ba Lospalos ne’ebé mak sei halo duni iha tinan ne’e no sei la muda tan fali ba tinan oin.
“Atu informa ba ita boot sira hotu no ba inan aman sira hotu kona ba ita-nia estrada ligasaun Lautem ba Lospalos no Lautem ba Com, semana kotuk iha reuniaun koordenasaun territoriál kona ba Orsamentu Geral Estadu nian, Ministru Obras Publikas ami konvida ba iha ne’ebá no iha break ha’u koalia ho Ministru Obras Publikas kona ba progresu tenderizasaun estrada Lautem Lospalos no Lautem Com ninian”. Informa Nia ba Lautem Post, Iha intervensaun ba abertura feira produtu lokál no non lokál ne’ebé hala’o iha postu Administrivu Lautem, Segunda (13/05).
“No resposta husi sua exelénsia Ministru Obras Publikas katak prosesu agora dadaun iha ona komisaun nasionál aprovizionamentu, se laiha impaktu maka iha fin dó Maio hetan ona kompañia vensedór hodi asasina kontratu atu nune’e iha Jullu ita bele halo ona Lansamentu ba primeira Pedra”, katak nia.
Nia reforsa tan, no antes ha’u hakat mai iha ne’e mós ha’u telefone ona ba diretór geral obras publikas ninian, ha’u nafatin ezije kona ba ita-nia estrada Lautem nian no resposta ne’ebé ha’u hetan pozitivu tebes.
“Ne’ebe ha’u husu ba inan aman sira no povu tomak, pasiénsia tanba ita pasiénsia ita sei bele manán buat barak. Ne’ebé la bele ezije barak liu, pasiénsia í ha’u fiar Katak ita-nia estrada sira ne’e sei realiza iha tinan ida ne’e, la ba fali iha tinan oin maibé iha tinan ida ne’e”. Nia garante.
Melio hatutan, ohin ha’u Koalia mós kona ba estrada husi toko 9 ba Lore, ha’u Koalia estrada husi Trisula ba Tutuala no resposta pozitivu. Tanba ne’e ha’u husu ba inan aman sira pasiénsia hodi simu, í karik dezenvolvimentu sira ne’e mai.
Prezidente Autoridade ne’e subliña tan, hau apresia momentu ita iha GOR(Ginajiu Lautem) ne’ebé ke sua exelénsia Primeiru Ministru mós marka prezensa iha fatin ne’ebá, no ha’u apresia ba xefe suku Com ninian deklarasaun, apresia ba xefe suku Maina 1, Pairara, Rasa nia deklarasaun ne’ebé ke pozitivu tebetebes, katak prontu atu apoiu 100% ba iha dezenvolvimentu Lautem ninian liu liu ba prosesu konstrusaun estrada Lautem Com no Lautem Lospalos.
“Ida ne’e maka ita tenke apresia, labele mai husu uluk mak kompensasaun, husu uluk mak indemnizasaun, buat ne’e la’o tia lai karik kona ita boot nia toos laran mak ita foin ko’alia, labele ha’u-nia toos ne’e tenke fó uluk ida ne’e lai se lea estrada la bele liu, ida ne’e ita la koopera ba iha dezenvolvimentu.” Nia apela.
Ita-nia asuwa’in sira ne’ebé mak mate ba rai ida ne’e la nikmati, sira la sente buat ne’e, sira oferese sira nia vida tomak agora sira mate tia ona no sira la goza, no ita ne’e ita tenke agradese tanba maromak sei tulun, ita mak sei moris no sei bele goza iha sira ne’ebé mak mate ona ne’e nia leet.
“Ne’ebe ita tenke kuidadu, ita tenke apresia, ita tenke apoia ba dezenvolvimentu ne’ebé ke governu halo ba iha ita-nia munisípiu”. Nia hakotu.
Jornalista: Veru
Editór: Joenaca Tupa da Conceição
