Tutuala- Rusa fuik iha Illeu Jaco ne’ebé pertense ba parke Nino Conis Santana, oras ne’e nia moris ameasa tanba la iha ona Bee moos hodi konsumu.
Ekipa Guarda Florestal, postu administrativu Tutuala, Jose Ramaelo, hateten, tempu bailoron falta bee moos halo rusa hamrook , tanba ne’e husu ba governu, fornese bee ba rusa no balada sira seluk iha illeu Jaco hodi konsumu.
“Bee agora ita akumula (tampung) hela iha profil ne’e uitoan ona, la to’o ona litru 4.000. Ami husu ba governu fornese bee ba ita nia rusa ne’e”, dehan nia ba Lautém Post.
Durante ne’e ekipa halo observasaun iha illeu Jaco, du’ut maran hotu ona, oras ne’e rusa fuik han de’it mak ai-tahan no ai-abut.
“Oras ne’e, rusa sira han de’it ai-tahan no ai-abut tanba du’ut iha ai-laran ne’e hotu ona, bee mós laiha ona, ne’ebé parte governu tenke fornese bee ba ita nia animal sira ne’e”, nia rekomenda.
Iha fatin hanesan, jestór Parke nasionál, Antonio da Fonseca, realsa, rusa no balada sira seluk iha Jaco maus tebes bainhira vizita ho intensaun ho di’ak, tanba ne’e presiza proteje ba balada sira.
“Ami hotu-hotu mai vizita ne’e so intensaun ida katak ha’u la estraga nee sira sei besik ita. So bainhira ita dehan katak ha’u sempre ba oho sempre ba duni nia, nia sempre dook hotu”, dehan nia.
Reportagen : Veru Fernandes
Editor : Black Angel
