Lospalos: Relasiona ho Impaktu husi mudansa klimátika ne’ebé afeta ba atividade produsaun husi to’os na’in sira iha munisípiu Lautem, Food And Agriculture Organization Of The United Nations (FAO) distribui tablet ho marka Samsung Galaxi hamutuk unidade 30 ba estensionista na’in 30 atu utiliza hodi sosializa impaktu husi mudansa klimátika ba to’os na’in sira iha munisípiu Lautem.
Nasionál Agromet And Remote Sengsimg Expert, Marcolino Goncalves esplika, objetivu husi distribui ekipamentu Tablet ne’e, atu fasilita estensionista sira hodi foti dadus ho lalais inklui identifika área agrikultura ne’ebé mak sai risku ba impaktu husi mudansa klimátika nian iha nivel suku.
“Objektivu ita distribui tablet ba estensionista sira para oinsá sira uza tablet ne’e hodi fahe informasaun kona-ba mudansa klimátika, no kolleita dadus iha iha nivel suku hodi halo kalkulasaun ba lakon ka estragus, tanba agora ita hasoru risku dezastre naturais sira.” Dehan nia ba jornalista Lautem Post.
Tuir nia, Timor-Leste mós dadaun ne’e afetadu mós ba mudansa klimátika, liuliu iha setór agrikultura nian ne’ebé mak kada tinan lakon ka hetan estragus husi mudansa klimátika.
Tanba ne’e, nia haktuir, liu-husi ekipamentus ne’e estensionista sira bele identifika hodi relata ba governu atu bele toma atensaun ba área sira ne’ebé mak presiza atu halo intervensaun.
“Factor agrikultura sei afetadu ba dezastre, tanba ne’e kolleita dadus para hatene karik área potensiál hirak lakon no estraga hodi sai informasaun ida ba ema ne’e atu foti desizaun hodi hatene área ne’ebé presiza intervensaun, no agrikultura hirak mak presiza halo intervensaun.” Nia esplika
Iha sorin seluk, Secretariu Munisipal Planeamentu Investimentu No Dezenvokvimentu Integradu Tiborsiu Dos Santos, apela ba estensionista sira atu utiliza ekipamentus hanesan tablet ne’e hodi halo serbisu ho di’ak.
“Husu ba estensionista sira katak materiál hirak ne’e uza atu nune’e hetan dadus ne’ebé ita presiza entaun kuidadu didi’ak materiál sira nune’e bele uza iha tempu naruk.” Nia afirma.
Entretantu, Extensionista Carolino da Silva hatete, nia parte prontu atu utiliza ekipamentus refere hodi halo atendimentu ba agrikultór sira liuliu oinsá atu foti dadus setór agrikultura nian iha terenu.
“Ami agradese tebes ba parseiru FAO bele ajuda governu hodi fasilita ona ekipamentus ba ami hodi halo atendimentu ba agrikultura sira iha suku ida-idak.” Nia agradese.
Jornalista: Veru
Editór: Joenaca Tupa da Conceição
