Lautem Post – Fós folin ne’ebé aumenta husi nasaun ‘exportador’ Vietname ho Índia, provoka aumentu folin fós iha territóriu nasionál inklui folin fós iha munisipiu Lautém
Negosiante no konsumidór iha munisípiu Lautém preokupa fós ho kg 20 nia folin aumenta husi dolar $14.50 ba $19.00.
Na’in ba Loja Salvasaun, Zelino Jhonlay, hateten, Fós nia folin iha Dili laran aumenta maka’as tanba kompañia fornesedór ‘Perisos’ sosa tutan husi nasaun importadór (Vietname no Índia) ne’ebé aumenta folin fós.
Nia esplika, oras ne’e kompañia fornesedór hatuur nia regra, fa’an fós hamutuk ho masin-midar.
“Iha Vietname ho Índia folin fós aumenta. Entaun implika mós folin fós iha Timor. Ami sosa saku 100 tenke hola hamutuk ho masin-midar saku karón ida, entaun agora ami iha fós karón rihun 10 masin-midar iha saku rihun ida” dehan nia ba Lautém Post foin lalais ne’e.
sorin seluk, konsumidór Agapito Pinto, husu ba governu hodi hatún taxa importasaun, nune’e normaliza folin fós iha merkadu.
Agapitu sente triste ba folin fós ne’ebé aumenta maka’as tanba oan barak labele jere fós karón ida durante fulan ida tomak.
“Ha’u iha oan na’in 7, aumenta tan ho família husi foho mai hela ho ha’u. Ha’u jere susar. Ministériu Komérsiu tenke kontrola” nia preokupa no husu.
Antes ne’e, iha debate orsamentu ratifikativu ba tinan 2023, deputadu sira iha parlamentu nasionál husu ba governu hodi normaliza sasán folin iha merkadu.
Reportajen : Paulus Leo/Sozinho
Editor : Ratu-Lata
