LOSPALOS- Sorumutu Konsellu Ministru nian iha loron 21 Novembru tinan 2024, halo aporvasaun no deliberasaun ba projetu sira ne’ebé aprezenta husi Ministru Obras Públika, Samuel Marçal, atu halo manutensaun no konstrusaun ba estrada husi Lautém ba Com no Lautem bá Lospalos Vila.
Konsellu Ministru ne’ebé lidera direita husi Primeiru-Minsitru, Kay Rala Xanana Gusmão, konsege halo aprovasaun no deliberasaun ka autorizasaun ba despeza mak hanesan:
- Autoriza despeza ba reabilitasaun no manutensaun ba seksaun estrada entre Lospalos no Lautein, ho naruk km 27,980, ho valór obra ne’ebé prevee dolar amerikanu millaun 22,7.
- Autoriza despeza ba reabilitasaun no manutensaun ba seksaun estrada entre Lautein no Kom, ho nia naruk km 19,760, ho valor obra ne’ebé prevee dolar Amerikanu millauns 13,8.
Alende ne’e, Konsellu Ministru halo aprovasaun ba munisípiu seluk nian mak hanesan: autoriza despeza ba konstrusaun edifísiu eskritóriu andar neen ba Ministériu Obras Públikas, no edifísiu andar ida besik ba Laboratóriu Enjeñaria Sivíl, ho kustu besik dolar amerikanu millaun 20, autoriza despeza ba reabilitasaun no manutensaun seksaun estrada entre Seloi, Aileu no Gleno, Ermera, ho naruk km 18, ho valór obra ne’ebé prevee dolar amerikanu millaun 15,97 no autoriza despeza ba reabilitasaun no manutensaun seksaun estrada entre kruzamentu Letefoho no Gleno, ho naruk km 24,140, ho valór obra ne’ebé prevee dólar amerikanu millaun 45.
Kria ekipa task force asegura natál no tinan foun
Konsellu Ministru mós aprova Projetu Rezolusaun Governu ne’ebé aprezenta hosi Ministru Defeza no Interiór, Donaciano do Rosário Gomes no Francisco da Costa Guterres, ida-idak, kona-ba kompromisu Operasionál Konjuntu entre Falintil-Forsa Defeza Timor-Leste no Polísia Nasionál Timor- Leste, hodi garante seguransa, estabilidade sosiál no moris-di’ak populasaun nian, durante Serimónia Ofisiál sira ba Komemorasaun Aniversáriu Proklamasaun Independénsia Timor-Leste nian ba dala 49, nune’e mós durante festividade Natál no Tinan Foun nian.
Rezolusaun Governu ne’e estabelese operasaun patrullamentu no vijilánsia iha fatin sensivel sira iha munisípiu hotu-hotu, prevene aktu instabilidade sosiál. Forsa Tarefa ne’e sei koordena husi Xefe Estadu Maior Jenerál Forsa Armada no Komandante Jerál PNTL, ho apoiu husi entidade governamentál no institusionál oioin.
Rezolusaun ne’e prevee mós medida espesífiku sira, hanesan definisaun hosi kadeias komandu, regras empeñu no apoiu intelijénsia nian, no mós uzu proporsionál hosi forsa tuir lejizlasaun atuál. Períodu operasaun Task Force ida-ne’e sei hahú iha loron 20 fulan-novembru tinan 2024 to’o loron 5 fulan-janeiru tinan 2025.
EKIPA: LAUTEM POST
